NTR Biopic: నాడు, నేడు ‘మనదేశంతో’నే.. బాలయ్య గెటప్ కేక!

విశ్వవిఖ్యాత నటుడు నందమూరి తారక రామారావు బయోపిక్ రెగ్యులర్ షూటింగ్ గురువారం ప్రారంభమైంది. ఎన్టీఆర్ హీరోగా పరిచయమైన ‘మనదేశం’ మూవీ లుక్‌లోనే దర్శకుడు క్రిష్ ఈ చిత్ర షూటింగ్ మొదలుపెట్టడం విశేషం. ‘మన దేశం’ సెట్స్‌లో బాలయ్య అచ్చం ఎన్టీఆర్‌ను తలపిస్తోన్న ఫొటోను డైరెక్టర్ క్రిష్ షేర్ చేశాడు. నాడు, నేడు ‘మనదేశం’తోనే చరిత్రకు శ్రీకారం అంటూ.. హీరో నందమూరి బాలకృష్ణ, క్రిష్ జాగర్లమూడి తెలుగు ప్రజల ఆశీస్సులు కోరారు.

ఎన్టీఆర్ బయోపిక్‌లో బాలయ్య 50 గెటప్‌లలో కనిపించనున్నాడని టాక్. దీంతో ఈ మూవీ సంక్రాంతికి విడుదల కావడం అనుమానంగా మారింది. కానీ ‘గౌతమీ పుత్ర శాతకర్ణి’ని క్రిష్ చాలా వేగంగా తెరెకెక్కించినట్టే.. ఈ మూవీని కూడా జెట్ స్పీడ్‌తో డెరెక్ట్ చేస్తాడని ఫ్యాన్స్ భావిస్తున్నారు. నందమూరి అభిమానులతోపాటు, యావత్ తెలుగు ప్రేక్షకులు ఆసక్తిగా ఎదురు చూస్తోన్న ఈ చిత్రంలో తారక రాముడి భార్య బసవతారకం పాత్రలో బాలీవుడ్ హీరోయిన్ విద్యాబాలన్‌ను ఎంపిక చేసిన సంగతి తెలిసిందే.

వాస్తవానికి తేజ డైరెక్షన్లో ఎన్.టి.ఆర్. ప్రారంభం కాగా.. తర్వాత అనూహ్యంగా ఆయన ఈ ప్రాజెక్ట్ నుంచి వైదొలిగారు. దీంతో చాలా కాలంపాటు ఎన్.టి.ఆర్. ప్రాజెక్ట్ అలా ఉండిపోయింది. తర్వాత బాలయ్య బాబు క్రిష్‌కి ఆ బాధ్యతలు అప్పగించిన విషయం విదితమే.