Ram Gopal Varma: యాంకర్ శ్యామలపై ఆర్జీవీ సీరియస్.. స్టేజ్ దిగి వెళ్లిపోయిన వర్మ

కాంట్రవర్సీ కింగ్, స్టార్ డైరెక్టర్ రామ్ గోపాల్ వర్మ (Ram Gopal Varma) ఏం చేసినా అది ఓ సెన్సెషన్ అవుతుంది. తనకు నచ్చిందే చేస్తాడు.. నచ్చకపోతే మొఖంపైనే చెప్పేస్తాడు. అవతలి వారు ఎవరు ఉన్నా.. వారు ఏమనుకున్నా తన మనసులోని మాటను ఇట్టే చెప్పేస్తాడు. తాజాగా యాంకర్ శ్యామలపై కాస్త సీరియస్ అయ్యారు. ఆర్జీవీని విసిగించే ప్రశ్నలు అడగటంతో ఆయన అసహనం వ్యక్తం చేశారు.

ఆర్జీవీ డైరెక్షన్‌లో తెరకెక్కిన మూవీ అమ్మాయి (Ammayi). పూజా భాలేకర్ (Pooja Bhalekar) టైటిల్ రోల్ పోషించగా.. మార్షల్ ఆర్ట్స్‌ బ్యాక్‌డ్రాప్‌లో ఈ సినిమాను రూపొందించారు. జులై 15న ఈ సినిమా ఆడియన్స్ ముందుకు రానుంది. ఈ నేపథ్యంలోనే ఈ సినిమా ప్రీరిలీజ్ (Ammayi Movie Pre Release Event) ఈవెంట్‌ను నిర్వహించారు. ఈ సందర్భంగా మాట్లాడిన ఆర్జీవీ.. సినిమా గురించి చెబుతూ అందరికీ థ్యాంక్స్ చెప్పాడు. అనంతరం వెళ్లిపోతుండగా.. యాంకర్ శ్యామల వచ్చి చిన్న రిక్వెస్ట్ అంటూ మార్షల్ ఆర్ట్స్‌కు సంబంధించి వచ్చిన కొన్ని సినిమాల పేర్లను చెప్పాలంటూ కొన్ని ప్రశ్నలు వేసింది.

మొదటి ప్రశ్నకే వర్మ కాస్త అసహనం వ్యక్తం చేశాడు. ఇది గమనించలేకపోయిన శ్యామల మరో ప్రశ్న వేసింది. దీంతో ఆర్జీవీకి చిర్రెత్తుకొచ్చింది. 'నేను ప్రస్తుతం చాలా ఎమోషనల్‌గా ఉన్నా. ఇది చాలా సీరియస్ సినిమా..' అంటూ మైక్ ఇచ్చేసి వర్మ స్టేజ్ దిగి వెళ్లిపోయాడు. అనంతరం శ్యామల మాట్లాడుతూ.. ఆర్జీవీ సమాధానాలు అంటే ఆసక్తి వింటారనే తాను ఈ ప్రశ్నలు అడిగానంటూ క్షమాపణలు చెప్పింది. ఇందుకు సంబంధించిన వీడియో వైరల్ అవుతోంది.

అయితే గతంలో యాంకర్ శ్యామలను ఆర్జీవీ పొగిడిన విషయం అందరికీ గుర్తుచేసుకుంటున్నారు. 'బడవ రాస్కెల్‌' సినిమా ప్రీ రిలీజ్‌ ఈవెంట్‌కు హాజరైన వర్మ.. శ్యామలను చూసి ఓ రేంజ్‌లో పొగిడాడు. 'ఇంత అందంగా ఉన్న మీరు.. నా కళ్లలో నుంచి ఎలా తప్పించుకున్నారు..' అంటూ తన మనసులోని మాట చెప్పేశాడు. ఇప్పుడు ఆ అందమైన యాంకర్‌పై ఆర్జీవీ కాస్త అసహనం వ్యక్తం చేశాడు.