కసరత్తులు చేయండి.. కళంకం పోతుంది: హృతిక్‌ ఫైర్

కంగనా రనౌత్‌‌తో వివాదం ఇంకా కొలిక్కి రాకుండానే బాలీవుడ్ హీరో హృతిక్ రోషన్ మరో వివాదంలో చిక్కుకున్నాడు. తెలుగులో ‘లోఫర్’ సినిమాలో నటించిన హీరోయిన్ దిశా పఠానీపై హృతిక్ మనసు పాడేసుకున్నాడనే వార్తలు షికారు చేశాయి. ఈ విషయం తెలిసి దిశా హృతిక్‌తో చేయాల్సిన సినిమాను వదిలేసుకుందని తెలిసింది.

అయితే, ఇవి కేవలం వదంతులు మాత్రమేనని, ఇందులో వాస్తవం లేదని హృతిక్, దిశా పఠానీలు మంగళవారం స్పష్టం చేశారు. వివిధ పత్రికల్లో వచ్చిన వార్తలను ఖండిస్తూ వేర్వురుగా ట్వీట్‌ చేశారు. హృతిక్ స్పందిస్తూ.. ‘‘ప్రియమైన ‘పత్రికా జీ’, మీరు కసరత్తులు చేస్తారా? లేకపోతే, కాస్త జిమ్‌కు వెళ్లండి. మెదడులోని చెత్తంతా వదిలిపోతుంది. ముఖ్యంగా డాంకీ కిక్స్, మంకీ రోల్, డాగ్ జంప్స్‌లు వంటి వ్యాయామాలు మీకు సరిపోతాయి. తప్పకుండా చేయండి. గుడ్ లక్, గుడ్ డే. లవ్‌యూ టూ’’ అంటూ చురకలు వేశాడు.
దిశా పఠానీ స్పందిస్తూ.. ‘‘హృతిక్ సర్ మీద కొన్ని బాధ్యతారాహిత్య గాసిప్‌లు వస్తున్నాయి. అవి ముమ్మాటికీ అసత్యాలు. ఆయనతో నాకున్న పరిచయం చాలా తక్కువ. ఆయన చాలా మర్యాద కలిగిన వ్యక్తి. ఆయన వల్ల నేను ఏ సినిమా నుంచీ తప్పుకోలేదు’’ అని స్పష్టత ఇచ్చింది.