Vijay Deverakonda: లైగర్ సినిమాతో భారీగా నష్టపోయా.. విజయ్ నిరాశ చెందాడు: వరంగల్ శ్రీను

ఎన్నో అంచనాల మధ్య రిలీజ్ అయిన రౌడీ స్టార్ విజయ్ దేవరకొండ (Vijay Deverakonda) లైగర్ (Liger) మూవీ బాక్సాఫీసు వద్ద డిజాస్టర్‌గా నిలిచింది. డేరింగ్ డైరెక్టర్ పూరి జ‌గ‌న్నాథ్ (Puri Jagannadh) స్పోర్ట్స్ బ్యాక్‌డ్రాప్‌లో ఈ సినిమాను తెరకెక్కించగా.. ఆడియన్స్‌ను మెప్పించలేకపోయింది. పాన్ ఇండియా రేంజ్‌లో స‌త్తా చాటాల‌నుకున్న విజయ్‌కు ఈ మూవీ రిజల్ట్‌తో ఎదురుదెబ్బ తగిలిందని సినీ విశ్లేషకులు అంటున్నారు. తాజాగా లైగర్ ఫ్లాప్ కావడంపై ఈ మూవీ డిస్ట్రిబ్యూటర్‌ వరంగల్‌ శ్రీను (Warangal Srinu) స్పందించారు.

లైగర్ మూవీపై విజయ్‌ దేవరకొండ అతి నమ్మకంతో ఉన్నాడో లేదో తాను చెప్పలేనని ఆయన అన్నారు. ఈ సినిమా ఆడియన్స్‌కు కచ్చితంగా నచ్చుతుందని విజయ్ అనుకున్నాడని చెప్పారు. అయితే రిలీజ్ అయిన తరువాత రిజల్ట్ చూసి చాలా నిరాశ చెందాడని అన్నారు. బాయ్‌కాట్ ట్రెండ్ వల్లే లైగర్ సినిమాకు నెగిటివ్ టాక్ వచ్చిందన్నారు. ఈ మూవీ వల్ల తాను 65 శాతం పెట్టుబడులు నష్టపోయానంటూ చెప్పుకొచ్చారు.

నటీనటులు, డైరెక్టర్స్, ప్రొడ్యూసర్స్‌ను టార్గెట్ చేస్తూ.. బాయ్‌కాట్‌ ట్రెండ్‌ని క్రియేట్‌ చేస్తున్నారని అన్నారు వరంగల్ శ్రీను. ఇలా చేయడం వల్ల సినీ రంగంపై ఆధారపడిన ఎంతో మంది కార్మికులపై ఆ ప్రభావం పడుతోందన్నారు. ప్రస్తుతం సినీ ఇండస్ట్రీ గడ్డుకాలం ఎదుర్కొంటుందని.. సోషల్‌మీడియా బ్యాన్‌ కల్చర్‌ వల్ల మరింత ఇబ్బందులు ఎదురవుతున్నాయని అన్నారు. మూవీ రిలీజ్ అయిన తరువాత నచ్చకపోతే విమర్శించాలని.. ముందే బాయ్‌కాట్ అంటూ ఎలా విమర్శలు చేస్తారని ప్రశ్నించారు.

వరంగల్ శ్రీను‌కు ఈ ఏడాది కలిసిరాలేదని చెప్పాలి. మెగాస్టార్ చిరంజీవి 'ఆచార్య' సినిమా ఆయనకు భారీ నష్టాలనే మిగిల్చింది. డైరెక్టర్, హీరోలు కొంత హెల్ప్ చేసినా.. పెద్దగా ఉపయోగపడలేదు. విరాటపర్వం మూవీ కూడా డిజాస్టర్ కావడంతో ఆయన బిజినెస్‌పై దెబ్బపడింది. తాజాగా లైగర్ మూవీతో మరింత నష్టాలు చవిచూశాడు. ఈ ఏడాది వరంగల్ శ్రీను దాదాపు రూ.100 కోట్లు నష్టపోయినట్లు తెలిసింది.