ఎన్టీఆర్ బయోపిక్: దగ్గుబాటి పాత్రలో ఆ నటుడు?

ఎన్టీఆర్ జీవిత కథ ఆధారంగా రూపొందుతున్న ‘ఎన్టీఆర్’సినిమాలో నటుడు భరత్ రెడ్డికి స్థానం దక్కిందని తెలుస్తోంది. ఎన్టీఆర్ పెద్దల్లుడు దగ్గుబాటి వెంకటేశ్వరరావు పాత్రలో భరత్ కనిపించనున్నాడని సమాచారం. ఈ మేరకు ఎంపిక జరిగినట్టుగా ప్రచారం జరుగుతోంది. ఎన్టీఆర్ పెద్ద కూతురు పురందేశ్వరి భర్తే దగ్గుబాటి వెంకటేశ్వరరావు అని తెలుగు వాళ్లకు చెప్పనక్కర్లేదు. ఎన్టీఆర్ రాజకీయాల్లోకి వచ్చాకా, తెలుగుదేశం పార్టీ ఆవిర్భవించాకా ఆ రాజకీయంలో దగ్గుబాటిది క్రియాశీల పాత్ర అని అంటారు.

ఇక ఎన్టీఆర్‌ను సీఎం పీఠం నుంచి దించేసిన సందర్భంలో కూడా దగ్గుబాటి ప్రస్తావన తప్పకపోవచ్చు. ఎన్టీఆర్‌ను రెండో సారి ముఖ్యమంత్రి పదవి నుంచి దించేసిన సందర్భం గురించి దగ్గుబాటి అనేక మార్లు మీడియాతో మాట్లాడిన దాఖలాలున్నాయి. నాటి పరిణామాలను వివిధ సందర్భాల్లో వివరించారాయన.

తెలుగుదేశం అధినేతగా చంద్రబాబు నాయుడు ఎన్నికయ్యాకా కొన్నాళ్లకు దగ్గుబాటి ఆ పార్టీని వీడారు. తర్వాతి కాలంలో కాంగ్రెస్ పార్టీలో చేరారు. కాంగ్రెస్ పార్టీ తరఫు నుంచి ఎమ్మెల్యేగా ఎన్నికయ్యారు. దగ్గుబాటి పురందేశ్వరి కాంగ్రెస్ నుంచి ఎంపీ అయ్యారు. కేంద్రమంత్రి పదవిని కూడా పొందారామె. ప్రస్తుతం పురందేశ్వరి భారతీయ జనతా పార్టీలో ఉన్నారు.

దగ్గుబాటి వెంకటేశ్వరరావు పాత్రకు నటుడి ఎంపిక జరిగిందన్న వార్తల నేపథ్యంలో.. ఆయనను సినిమాలో ఎలా చూపుతారనే అంశంపై చర్చ జరుగుతోంది.