ఫోన్ కాల్స్‌‌, కామెంట్లతో వేధిస్తున్నారు: అనసూయ

అభిమానులకు ట్విట్టర్ ద్వారా రిపబ్లిక్ డే శుభాకాంక్షలు చెప్పిన యాంకర్ అనసూయ.. తనను కించపరిచేలా మాట్లాడుతున్నారంటూ ఆవేదన వ్యక్తం చేసింది. గణతంత్ర దినోత్సవం సందర్భంగా.. తన పట్ల కొందరు వ్యవహరిస్తోన్న తీరును జబర్దస్ యాంకర్ తీవ్రంగా నిరసించింది. నాకు నచ్చిన పని చేసుకునే స్వేచ్ఛ లేదా అని ప్రశ్నించింది. సంప్రదాయం, సంస్కృతి పేరిట కొందరు గుండాలు నా గౌరవానికి భంగం కలిగిస్తున్నారంటూ వాపోయింది.

‘డియర్ ఇండియా.. ఓ కూతురిగా, సోదరిగా, మహిళగా, భార్యగా, కోడలిగా, అమ్మగా.. మిగతా వాళ్లలాగే నా బాధ్యతలను నేను నిర్వర్తిస్తున్నాను. నా పని, నేను వస్త్రధారణ పట్ల మా ఇంట్లో వాళ్లపై ఎలాంటి ప్రభావం లేదు. కానీ ఇతరులపై ప్రభావం చూపుతున్నట్లుగా ఉంది. మాట్లాడే స్వేచ్ఛ ఉంది కదా అని కొందరు నన్ను కించపరిచేలా మాట్లాడుతున్నారు, దూషిస్తున్నారు. నా పట్లే కాదు, నా భర్త, పిల్లలు, ఇతర కుటుంబ సభ్యులను అగౌరవ పరుస్తున్నారు. నిత్యం ఫోన్ కాల్స్, కామెంట్ల ద్వారా ఇబ్బందికర పరిస్థితిని ఎదుర్కొంటున్నాను. వాటి గురించి తెలుసుకునే శక్తి కూడా మీకు లేదు’ అని అనసూయ ట్వీట్ చేసింది.


నచ్చిన పని చేసుకునే స్వేచ్ఛ లేదా? నా గౌరవాన్ని కాలితో నలిపేస్తారా? ఇలాగే జీవించాలా? దీని గురించి ఏం చేయలేమా అని అనసూయ ఆవేదన వ్యక్తం చేసింది. ఓ బాధ్యతాయుతమైన మహిళగా రిపబ్లిక్ డే సందర్భంగా ప్రశ్నిస్తున్నా. స్వేచ్ఛ అంటే ఇదేనా అని అనసూయ ట్వీట్ చేసింది.