AMMK: తమిళ రాజకీయాల్లోకి తెలుగు గాయకుడు మనో.. ఏ పార్టీ అంటే?

ప్రముఖ గాయకుడు నాగూర్‌బాబు (మనో) రాజకీయాల్లోకి ప్రవేశించారు. అన్నాడీఎంకే నుంచి విభేదించి స్వంత కుంపటి పెట్టుకున్న శశికళ మేనల్లుడు టీటీవీ దినకరన్ పార్టీ ఏఎంఎంకేలో ఆయన శనివారం చేరారు. దక్షిణాది భాషల్లో పలు చిత్రాల్లో 25 వేలకు పైగా పాటలు, 25 వేలకు పైగా భక్తి గీతాలను ఆలపించిన మనో, ప్రత్యేక ఆల్బమ్‌లను కూడా రూపొందించారు. గుంటూరు జిల్లా సత్తెనపల్లికి చెందిన నాగూర్‌బాబు గాయకుడిగా పరిచయం కాకముందు బాల నటుడిగా నీడ అనే చిత్రంలో నటించారు. 1985లో ఇళయరాజా సంగీత దర్శకత్వంలో తొలి అవకాశం దక్కించుకున్న మనో, ఆయన స్వరకల్పన చేసిన సినిమాల్లో వేలాది పాటలను ఆలపించారు. నాగూర్‌బాబు పేరును మనోగా మార్చింది కూడా ఇళయరాజానే కావడం విశేషం. గాయకుడిగా ఆయన మొదటి పాట జయభేరి ఆర్ట్స్ బ్యానర్‌పై మురళీ మోహన్ తీసిన కర్పూరదీపం అనే సినిమా లోది. రజనీకాంత్‌ చిత్రాలకు తెలుగులో ఆయన డబ్బింగ్ చెప్పి మెప్పించారు.

గాయకుడిగానే కాదు నటనతోనూ మెప్పించిన మనో, పలు తమిళ చిత్రాల్లోనూ నటించారు. బుల్లితెరపై సంగీత కార్యక్రమాలకు న్యాయనిర్ణేతగానూ వ్యవహరించారు. సార్వత్రిక ఎన్నికలు సమీపిస్తున్న తరుణంలో టీటీవీ దినకరన్ పార్టీ అమ్మ మక్కల్‌ మున్నేట్ర కళగంలో మనో చేరడం చర్చనీయాంశమైంది. దీనిపై మనో మాట్లాడుతూ.. తాను తెలుగు వాడినే అయినా 35 ఏళ్లుగా తనకు తమిళనాడుతో విడదీయలేని అనుబంధం ఉందని అన్నారు. ముక్కుసూటిగా వ్యవహరించే దినకరన్‌ వ్యక్తిత్వం, ఆలోచనా విధానం నచ్చి ఆయన పార్టీలో చేరానని తెలిపారు. రాజకీయాల్లోనూ ప్రజల సంతోషం కోసం కృషి చేస్తానని మనో పేర్కొన్నారు.