అమ్మ సమక్షంలో ప్రభాస్‌కి పాలాభిషేకం

‘బాహుబలి 2’ సినిమాకు అన్ని వర్గాల నుంచి మంచి స్పందన వస్తుండటంతో ప్రభాస్ అభిమానులు పండగ చేసుకుంటున్నారు. రెండు తెలుగు రాష్ట్రాల్లో ప్రభాస్ అభిమానులు ఇప్పటికే స్వీట్లు పంచుకుంటూ.. బైక్ ర్యాలీలు తీస్తూ తమ హీరోపై ఉన్న అభిమానాన్ని చాటుకుంటున్నారు. హైదరాబాద్‌లో ప్రభాస్ ఫ్యాన్స్ మరో అడుగు ముందుకేసి ప్రభాస్ కటౌట్‌కి పాలాభిషేకం చేశారు. అదీ ప్రభాస్ పెద్దమ్మ, కృష్ణంరాజు భార్య.. శ్యామలా దేవీ సమక్షంలో చేయడం మరో విశేషం.

‘బాహుబలి 2’ సినిమాను చూసేందుకు శ్యామలా దేవీ శుక్రవారం మధ్యాహ్నం ప్రసాద్ ఐమ్యాక్స్‌కు వచ్చారు. ఆమె సమక్షంలో ఫ్యాన్స్ ప్రభాస్ కటౌట్‌కి పాలాభిషేకం చేశారు. తమ బిడ్డపై ఫ్యాన్స్ చూపిస్తున్న అభిమానానికి ఆమె ఎంతో సంబరపడిపోయారు. ‘మా బాబుపై మీ ఆదరణ, అభిమానం ఎప్పుడూ ఇలానే ఉండాలి అని కోరుకుంటున్నాం’ అని అన్నారు. అమ్మ సమక్షంలో ప్రభాస్ కటౌట్‌కి పాలాభిషేకం చేసే అవకాశం రావడంతో అభిమానులు కూడా ఎంతో ఆనందం వ్యక్తం చేశారు.