ఎదిగిన కూతురిగా నటించిన అమ్మాయితో.. హీరో రొమాన్స్!

‘దంగల్’ సినిమా ఎంత పెద్ద హిట్టో వివరించనక్కర్లేదు. అలాగే ఈ సినిమాలో తండ్రీ కూతుళ్లుగా ఆమిర్ ఖాన్, ఫాతిమా సనా షేక్ ల నటన గురించి కూడా ప్రత్యేకంగా వివరించనక్కర్లేదు. రియల్ టైమ్ రెజ్లర్ మహవీర్ సింగ్ ఫొగట్ గా ఆమిర్ ఖాన్, మహవీర్ కూతురు, కామన్ వెల్త్ మెడలిస్ట్ గీతా ఫొగట్ పాత్రలో ఫాతిమా అద్భుతంగా నటించారు. సినిమాలో ప్రధాన పాత్రలు వీరిద్దరివే. వీరి ప్రతిభకు, కష్టానికి తగ్గ పేరు, ప్రతిఫలం వచ్చింది.

‘దంగల్’లో కూతురిగా నటించిన ఫాతిమాకు ఆమిర్ ఖాన్ సినిమాల్లో వరసగా అవకాశాలు దక్కుతున్నాయి. ‘ఠగ్స్ ఆఫ్ హిందుస్థాన్’లో ఫాతిమ నటిస్తోంది. ఈ సినిమాలో ఆమిర్ ఒక ముఖ్య పాత్ర పోషిస్తున్నాడు. అంతే కాదు.. ఆమిర్ చేయబోయే తదుపరి సినిమా ‘సారే జహాసె అచ్చా..’లో కూడా ఫాతిమ నటించడం ఖాయమైంది. ఈ సినిమాలో ఆమిర్, ఫాతిమలు జంటగా నటించనుండటమే విశేషం.

సినిమాలో ఫాతిమ ఆమిర్ కు భార్య పాత్రలో నటించనుందని.. వారిద్దరి మధ్యనా రొమాంటిక్ సన్నివేశాలు ఉంటాయని బాలీవుడ్ వర్గాలు చెబుతున్నాయి. ఇది వరకూ కూడా కొంతమంది హీరోలు తమకు కూతుళ్లుగా నటించిన వారితో ఆపై ప్రణయ సన్నివేశాల్లో నటించారు. అయితే.. ఆమిర్, ఫాతిమలు మాత్రం కాస్తంత ప్రత్యేకం. పాతతరం హీరోలకు కూతుళ్లుగా నటించిన చైల్డ్ ఆర్టిస్టులు కొన్నేళ్ల విరామం తర్వాత హీరోయిన్లు అయ్యాకా తమ తండ్రి పాత్రధారుల సరసన నటించారు. దంగల్ లో ఆమిర్ కు ఫాతిమ ఎదిగిన కూతురుగా కనిపించింది. వెంటనే భార్యగా కనిపించబోతోంది.