మహేష్ బాబు ఓకే చెబితే, ఫిదా స్క్రిప్ట్ మారేదే: శేఖర్ కమ్ముల

సూపర్ స్టార్ మహేష్ బాబు అంగీకరించి వుంటే, ఫిదా స్క్రిప్ట్ కూడా మారేదే అంటున్నారు ఆ సినిమా డైరెక్టర్ శేఖర్ కమ్ముల. టాలీవుడ్‌లో కొంతమంది స్టార్స్ పేరిట వున్న రికార్డులని సైతం అధిగమిస్తున్న ఫిదా సినిమా వెనుకున్న ఓ ఆసక్తికరమైన విషయాన్ని వెల్లడించారు ఫిదా ప్రమోషన్స్‌లో పాల్గొంటున్న శేఖర్ కమ్ముల. ఈ సినిమా స్టోరీని వరుణే తేజ్ కన్నా ముందుగానే మహేష్ బాబుకి వినిపించారట ఆయన. కానీ ఇందులో స్టార్ హీరోల సినిమాల్లో వుండే మాల్, మసాలా, హంగామా ఏదీ లేకపోవడంతో తన అభిమానులని దృష్టిలో పెట్టుకుని నో చెప్పారట మహేష్ బాబు.

ఇదే సంగతి గురించి మాట్లాడుతూ... 'ఒకవేళ మహేష్ బాబు ఓకె చెప్పి వుంటే, అతడి ఫ్యాన్ ఫాలోయింగ్, ఇమేజ్‌ని దృష్టిలో పెట్టుకుని కథలో మార్పులు చేర్పులు చేసి వుండేవాడిని' అని అన్నారు శేఖర్ కమ్ముల. స్టార్ హీరోల సినిమాలకి స్క్రీన్‌ప్లే ఎలా రాసుకోవాలో తనకి బాగా తెలుసు అని అభిప్రాయపడ్డారు ఫిదా డైరెక్టర్. అదండీ 'ఫిదా' గురించి చాలామందికి తెలియని సంగతి!