అరుదైన వ్యాధితో బాధ పడుతున్నా.. నటుడు ఇర్ఫాన్ ఖాన్ షాకింగ్ ట్వీట్

బాలీవుడ్‌ నటుడు ఇర్ఫాన్‌ ఖాన్‌ అరుదైన వ్యాధితో బాధపడుతున్నట్లు తెలిపి అభిమానులను షాక్‌కు గురిచేశారు. గత 15 రోజులుగా అనారోగ్యంతో ఇబ్బంది పడుతున్నట్లు ఆయన ట్వీట్‌ చేశారు. వ్యాధికి సంబంధించి మరిన్ని పరీక్షలు పూర్తియ్యాక మరో వారం, పది రోజుల్లో తన కథను పంచుకుంటానని ఆయన వెల్లడించారు. ‘అప్పటి వరకు.. నాకు అంతా మంచే జరగాలని కోరుకోండి’ అంటూ ట్విట్టర్‌లో పోస్ట్‌ చేశారు.

‘కొన్నిసార్లు జీవితం తలకిందులయ్యే విషయం గురించి వింటూ నిద్రలేవాల్సి వస్తుంది. గత 15 రోజులుగా నా జీవితం ఓ సస్పెన్స్‌ కథలా తయారైంది. అరుదైన కథల కోసం వెతికేవాడిని కాబోలు.. ఇప్పుడు నాకు ఇలాంటి అరుదైన వ్యాధి సోకింది. నేనెప్పుడూ సవాళ్లకు తలవంచలేదు. సాధ్యమైనంత వరకు పోరాడుతూనే ఉంటాను’ అని ఇర్ఫాన్ ట్వీట్ చేశారు.

కుటుంబ సభ్యులు, స్నేహితులు తనకు తోడుగా ఉన్నారని, అందరం కలిసి ఆపద నుంచి బయటపడటానికి ప్రయత్నిస్తున్నామని ఇర్ఫాన్ తెలిపారు. ఈ విషయంలో వదంతులు సృష్టించొద్దని అభిమానులను కోరారు.

ఫిబ్రవరి 21న ఇర్ఫాన్‌ ప్రతినిధి ఓ ప్రకటన విడుదల చేశారు. ఆ ప్రకటనలో ఇర్ఫాన్‌ కామెర్ల వ్యాధితో బాధపడుతున్నట్లు తెలిపారు. ఈ కారణంగా ఇర్ఫాన్‌ కొత్త సినిమా షూటింగ్‌ వాయిదా పడింది. విశాల్‌ భరద్వాజ్‌ దర్శకత్వం వహిస్తున్న ఈ సినిమాలో దీపికా పదుకొణె హీరోయిన్‌గా నటిస్తోంది.
🙏🏻 pic.twitter.com/JXD8NKwH3D — Irrfan (@irrfank) March 5, 2018