Pawan Kalyan అలాంటి సినిమా తీస్తే.. కచ్చితంగా ఓట్లు వేస్తారు: పరుచూరి గోపాలకృష్ణ

జనసేన అధ్యక్షుడు పవన్ కళ్యాణ్ (Pawan Kalyan) ఆశయం నెరవేరాలని కోరుకుంటున్నట్లు ప్రముఖ సినీ రచయిత పరుచూరి గోపాలకృష్ణ (Paruchuri Gopala Krishna) చెప్పారు. పరుచూరి పాఠాలు పేరుతో తన యూట్యూబ్‌ ఛానెల్‌లో ఆయన పవన్ కళ్యాణ్ గురించి మాట్లాడారు. ''పవన్ కళ్యాణ్ కెరీర్‌లో 27 సినిమాల వరకు చేసుంటాడు. ఒక టైమ్‌లో పవన్ కళ్యాణ్ అద్భుతంగా వెళ్లాడు. ఆ తరువాత డిఫరెంట్ స్కూల్స్‌లో వెళ్లాడు. అత్తారింటికి దారేది సినిమాతో జనాలను అయోమయం చేశాడు. మళ్లీ ఇప్పుడు డిఫరెంట్ సబ్జెక్ట్ ఎంచుకుంటున్నాడు.

కానీ సినిమా వేరు.. రాజకీయం వేరు. తమిళనాడు, కర్నాటక, ఏపీ, తెలంగాణలో సినిమా వాళ్లు రాజకీయాల్లోకి వచ్చిన సంగతి మనకు తెలుసు. ఓ పార్టీకి సపోర్ట్‌గా నిలబడదాం.. ఒకసారి పార్లమెంట్‌కు వెళ్లి వద్దామని అనుకోవడం వేరు. సమాజాన్ని తన దృక్పథంలో మార్చాలనే ఆశయం ఉండడం వేరు. ఈ ఆశయం పవన్ కళ్యాణ్‌ గారికి ఉంది. గతంలో ఎన్టీఆర్ కూడా ఇలానే తన ఆశయంతో పార్టీ స్థాపించారు. అన్న గారి ఆలోచనలానే ముందు బలమైన ప్రతిపక్షం ఉండాలని.. మన వాక్కు సభల ద్వారా ప్రజలకు తెలియజేయాలనే ఆలోచన పవన్ కళ్యాణ్‌ది.

ఎవరు కలిసి వచ్చినా.. రాకపోయినా తన పోరాటం తాను చేసుకుంటూ పోయేవాడే వీరుడు. అలాగే 2019 ఎన్నికల్లో పవన్ తనకంటూ అస్థిత్వాన్ని నిరూపించుకుందామని నిలబడ్డాడు. ఏ పార్టీ అధికారంలోకి రావాలి ఇలాంటి విషయాలు నేను చెప్పను. కానీ పవన్ కళ్యాణ్ గారి వాయిస్ చట్టసభల ద్వారా వినబడాలనే కోరుకునే వ్యక్తుల్లో నేను ఒకడిని. ప్రజాస్వామ్య బద్ధంగా ప్రశ్నించే హక్కు వచ్చే ఎన్నికల్లో ఆయన పొందాలి.

ఎన్టీఆర్ రాజకీయాల్లోకి రాకముందు బొబ్బిలిపులి, జస్టిస్ చౌదరి వంటి సినిమాలు చాలా హైప్ చేశాయి. కృష్ణ గారు తీసిన ఈనాడు సినిమా కూడా రామారావు గారికి ఎన్నికల టైమ్‌లో ఉపయోగపడింది. ఈ విషయాన్ని టీడీపీ నేతలే చెప్పారు. ఇలాంటి ఓ అద్భుతమైన చిత్రాన్ని పవన్ కళ్యాణ్ ఎంచుకోవాలి. ప్రజల్లోకి వెళ్లేవిధంగా చేయగలగాలి. ఓటర్లు ఎప్పుడు ఒకవైపే ఉండరు. వాళ్లకు కొన్ని ఆశలు, ఆశయాలు ఉంటాయి. వీటిని ఎవరు నెరవేరుస్తారని వాళ్లు ఎదురుచూస్తుంటారు. పవన్ కళ్యాణ్ జన్మదినం సందర్భంగా చట్ట సభల్లోకి రావాలని ఆశీర్వదిస్తున్నా. వస్తారనే నేను విశ్వసిస్తున్నా.." అంటూ గోపాల కృష్ణ చెప్పుకొచ్చారు.