విజయ్ దేవరకొండకు ఇది స్పెషల్ బర్త్ డే!

ఇతడు గత బర్త్ డే జరుపుకున్నప్పుడు ఎవరికీ పెద్దగా పట్టలేదు. కానీ ఇది మాత్రం విజయ్ దేవరకొండకు చాలా స్పెషల్ బర్త్ డే. గత ఏడాది ఆగస్టులో విడుదల అయిన ‘అర్జున్ రెడ్డి’తో విజయ్ జాతకం మారిపోయింది. టాలీవుడ్ లో ఓవర్ నైట్ స్టార్ అయ్యాడు. ఇప్పుడు చేతినిండా అవకాశాలు. క్రేజీ ప్రాజెక్టులు. బహుభాష సినిమాలు. ఇది విజయ్‌కి ఉన్న క్రేజ్ ఇప్పుడు.

ఇలా హ్యాపీ హ్యాపీగా తన పుట్టిన రోజును జరుపుకుంటున్నాడు ఈ హీరో. ఈ సారి మే 9 విజయ్‌కి చాలా ప్రత్యేకం. అర్జున్ రెడ్డి తర్వాత ఇతడు సైన్ చేసిన సినిమాల్లో ఒకటైన ‘మహానటి’ ఈ రోజు విడుదల అయ్యింది. ఇలాంటి సినిమాలో నటించడం ఒక రకంగా ఆనందకరం అయితే, అది తన పుట్టిన రోజు నాడు విడుదల కావడం ఈ హీరోకి రెట్టింపు ఆనందాన్ని ఇస్తోంది.

మహానటి విడుదలతో పాటు ఈ రోజు ఈ హీరో తదుపరి సినిమా ఒకదాని ఫస్ట్ లుక్ కూడా విడుదల అయ్యింది. భరత్ కమ్మ దర్శకత్వంలో మైత్రి మూవీ మేకర్స్ వారు రూపొందిస్తున్న ‘డియర్ కామ్రేడ్’ సినిమా ఫస్ట్ లుక్ ఈ రోజు విడుదల అయ్యింది. ‘ఫైట్ ఫర్ వాట్ యు లవ్’అనేది దీనికి ఉప శీర్షిక. ఈ సినిమా ఫస్ట్ లుక్‌లో కూడా విజయ్ తనకు అచ్చివచ్చిన బుల్లెట్‌ ఎక్కినట్టుగా ఉన్నాడు.