​ పర్సనల్ రీజన్.. సిగరెట్, మద్యానికి షారూక్ దూరం

బాలీవుడ్ బాద్‌షా షారూఖ్‌ ఖాన్ ఇకపై తాను సిగరెట్, మద్యం ముట్టుకోనని బహిరంగంగా ప్రకటించారు. తన గారాల కొడుకు కోసమే ఈ కఠిన నిర్ణయం తీసుకున్నట్లు వివరించిన షారూఖ్.. జిమ్‌లో కసరత్తులు చేసి ఆయుప్రమాణం కనీసం మరో 20 ఏళ్లు పెంచుకోవాలని ఆశిస్తున్నట్లు వివరించారు. తాజాగా జరిగిన ఓ ఇంటర్వ్యూలో ‘ సినిమాల కారణంగా మీ నాలుగేళ్ల కొడుకు అబ్రామ్‌తో ఎక్కువ సమయం గడపలేకపోతున్నాని మీరు బాధపడుతున్నారా..?’ అని ప్రశ్నించగా.. షారూఖ్ చాలా ఆవేదనగా సమాధానమిచ్చారు.

‘అవును. బాబుతో ఎక్కువ సేపు గడపలేనందుకు చాలా బాధపడుతున్నాను. ఇటీవలే ఈ బాధ గురించి ఓ రాత్రంతా తీవ్రంగా ఆలోచించాను. అప్పుడే సిగరెట్, మద్యం మానేయాలని కఠిన నిర్ణయం తీసుకున్నాను. ఎందుకంటే 50 ఏళ్ల వయసులో ఓ చంటి బిడ్డకు తండ్రిగా ఉండటం కొంచెం ఇబ్బందే.. జీవితం మనం అనుకున్నట్లు సాగదు’ అని షారూఖ్ ఖాన్ వివరించారు. షారూఖ్‌కి 15 ఏళ్లు వచ్చేలోపే అతని తల్లిదండ్రులు చనిపోయారు. దీంతో తన కొడుకుకి అలాంటి పరిస్థితి రాకుండా ఉండేందుకు షారూఖ్ ప్రస్తుతం క్రమం తప్పకుండా వ్యాయామాలు చేస్తూ ఆయుప్రమాణం పెంచుకునేందుకు ప్రయత్నిస్తున్నాడట. ఈ ఆలోచనలో భాగంగానే ఆరోగ్యం దెబ్బతీసే సిగరెట్, మద్యం లాంటి వ్యసనాలకు దూరంగా ఉండాలని నిర్ణయం తీసుకున్నట్లు తెలుస్తోంది. ప్రస్తుతం షారూఖ్ వయసు 51 ఏళ్లు.