ఫ్రెంచ్ దర్శకుడు ఫైర్: చిక్కుల్లో ‘అజ్ఞాతవాసి’

మూలిగే నక్కపై తాటి పండు పడినట్లు ‘అజ్ఞాతవాసి’పై మరో పిడుగు పడింది. పవర్ స్టార్ పవన్ కళ్యాణ్, త్రివిక్రమ్ కాంబినేషన్లో తెరకెక్కిన ఈ సినిమా తన చిత్రాన్ని పోలి ఉందని చెప్పిన ఫ్రెంచ్ దర్శకుడు జెరోమీ సలే ఇప్పుడు మరో అడుగు ముందుకేసి.. ఆ సినిమాపై కాపీ రైట్ యాక్ట్ కింద లీగల్ నోటీసులు పంపుతున్నాడు. ఈ విషయాన్ని అతనే స్వయంగా ట్వీట్ చేశాడు.

‘అజ్ఞాతవాసి’పై నెగటివ్ టాక్ రావడంతో కలెక్షన్లు బాగా పడిపోయిన సంగతి తెలిసిందే. ఇటీవల వెంకటేష్ సీన్లను కలిపినా పెద్దగా ఫలితం కనిపించలేదు. ఈ తరుణంలో డైరెక్టర్ జెరోమీ ఈ బాంబు పేల్చడంతో దర్శక నిర్మాతలు ఇప్పుడు అయోమయంలో పడ్డారు. తన హిట్ చిత్రం ‘లార్గో విన్చ్’ ఆధారంగా ‘అజ్ఞాతవాసి’ రూపొందించారని తెలిసి అతను అమెరికాలో ఈ సినిమా చూశాడు.

అనంతరం ట్విటర్‌లో ‘అజ్ఞాతవాసి’ గురించి కామెంట్ చేస్తూ.. ఈ సినిమా తనకు నచ్చిందని, ఇది ‘లార్గో విన్చ్’ను పోలి ఉందని తెలిపాడు. ఈ సినిమా హక్కులను టీ-సీరిస్ తీసుకుంది. ఈ సినిమాతో ‘అజ్ఞాతవాసి’ నిర్మాతలు ఒప్పందం కూడా కుదుర్చుకున్నారు. ఈ నేపథ్యంలో జెరోమీ లిగల్ నోటీసులు ఇస్తాననడం ఆసక్తి రేకెత్తిస్తోంది. దీనిపై ఓ అభిమాని అడిగిన ప్రశ్నకు ‘టీ-సీరీస్‌తో నిర్మాతలు ఒప్పందం కుదుర్చుకున్నా, అలా కుదరదు’ అని సమాధానం ఇచ్చాడు.

‘‘భారత చిత్ర పరిశ్రమలో నైపుణ్యం ఉన్నవారు చాలా మంది ఉన్నారు. ఇతరుల నుంచి తీసుకునే అవసరం లేకుండా సినిమాలు తీయగలరు. గతవారం రోజులుగా ‘అజ్ఞాతవాసి’ బృందం మౌనం వహిస్తోంది. ఇప్పుడు లీగల్‌ యాక్షన్‌ తీసుకుంటున్నాం’’ అని ట్వీట్‌లో పేర్కొన్నాడు. దీనిపై ‘అజ్ఞాతవాసి’ దర్శక నిర్మాతలు ఏం సమాధానం చెబుతారో చూడాలి.