అంగరంగ వైభవంగా గౌతమిపుత్ర శాతకర్ణి ఆడియో లాంచింగ్

బాలకృష్ణ కెరీర్‌లో అత్యంత ప్రతిష్టాత్మకంగా తెరకెక్కిన 100వ చిత్రం గౌతమిపుత్ర శాతకర్ణి ఆడియో విడుదల కార్యక్రమం అంగంగ వైభవంగా జరిగింది. కేంద్ర మంత్రి వెంకయ్య నాయుడు సమక్షంలో ఏపీ సీఎం చంద్రబాబు నాయుడు తిరుపతిలో ఈ సినిమా ఆడియో లాంచ్ చేశారు. దాదాపు 1800 ఏళ్ల క్రితంనాటి శాతవాహన చక్రవర్తికి సంబంధించిన జీవిత చరిత్ర ఆధారంగా తెరకెక్కిన ఈ చిత్రంపై బాలయ్య అభిమానుల్లో భారీ అంచనాలు ఉన్నాయి. నిర్మాతలు జే సాయిబాబు, రాజీవ్ రెడ్డి, సుహాసిని నిర్మించిన ఈ సినిమాను జాతీయ అవార్డ్ గ్రహీత క్రిష్ డైరెక్ట్ చేశారు.

శాతకర్ణి తల్లి గౌతమి పాత్రలో బాలీవుడ్ నటి హేమా మాలిని నటించగా, మరో ప్రముఖ హీరోయిన్ శ్రియ శాతకర్ణి భార్య పాత్ర పోషించారు. ఈ ఆడియో లాంచ్ ఫంక్షన్‌కి హాజరైన హేమామాలిని మాట్లాడుతూ... దాదాపు 5 దశాబ్ధాల క్రితం పాండవ వనవాసం అనే చిత్రంతో తాను తొలిసారిగా తెలుగు సినిమాలో నటించిన విషయాన్ని గుర్తుచేసుకున్నారు. ప్రస్తుతం బీజేపీ ఎంపీ కూడా అయిన హేమామాలినిని ఏపీ సీఎం చంద్రబాబు శాలువా కప్పి సన్మానించారు. కన్నడ ఫిలిం స్టార్ శివరాజ్ కుమార్ సహా ఎంతోమంది సినీ, రాజకీయ ప్రముఖులు ఈ ఆడియో వేడుకకు అతిథులుగా విచ్చేశారు.
Gautamiputra Satakarni audio launch video