శాతకర్ణి ప్రాజెక్ట్ నుండి సాయికొర్రపాటి ఔట్!

నందమూరి నటసింహం బాలకృష్ణ , నిర్మాత సాయి కొర్రపాటికి మధ్య ఉన్న అనుబంధం గురించి ప్రత్యేకంగా చెప్పనక్కర్లేదు. బాలయ్య కెరీర్‌లో మైలురాయిగా నిలిచిన 'లెజెండ్' సినిమాను నిర్మించింది సాయి కొర్రపాటే.. అంతేకాదు నందమూరి వంశపు మరో వారసుడు మోక్షజ్ఞ ఎంట్రీ కూడా సాయి కొర్రపాటి సినిమాతోనే ఉండనుంది. అంతగా నందమూరి ఫ్యామిలీకు దగ్గరైన సాయి కొర్రపాటి ఇప్పుడు బాలయ్య ప్రాజెక్ట్ నుండి తప్పుకున్నట్లు తెలుస్తోంది.

బాలకృష్ణ, క్రిష్ కాంబినేషన్‌‌లో రూపొందుతోన్న 'గౌతమీపుత్ర శాతకర్ణి' సినిమా సంక్రాంతికి విడుదల కానుంది. ముందుగా ఈ సినిమా వైజాగ్ సీడెడ్ హక్కులను తనకే ఇప్పించమని చెప్పిన సాయి కొర్రపాటి ఇప్పుడు మాత్రం వద్దు అంటున్నాడు. ప్రస్తుతం ఉన్న కరెన్సీ సమస్య వలన చిత్రబృందం ఆశించినంత మొత్తాన్ని ఇవ్వలేని పరిస్థితుల్లో ఉన్న కొర్రపాటి ఆ విషయాన్ని ముందుగా బాలకృష్ణకు తెలియజేశారట. అయితే మరికొందరు మాత్రం అంత మొత్తం పెట్టి సినిమా హక్కులను దక్కించుకుంటే తనకు లాభాలు వస్తాయో.. లేదో అనే అనుమానంతోనే ఆయన తప్పుకున్నారని అంటున్నారు.