వరుణ్ తేజ్‌తో ఘాజీ డైరెక్టర్ సినిమా ?

ఘాజీ సినిమాతో దర్శకుడిగా పరిచయమవడమేకాకుండా, తన తొలి సినిమాతోనే విమర్శకుల ప్రశంసలు అందుకున్న టాలీవుడ్ డైరెక్టర్ సంకల్ప్ రెడ్డి. రానా దగ్గుబాటి ప్రధాన పాత్రలో సంకల్ప్ రెడ్డి తెరకెక్కించిన ఘాజీ చిత్రం టాలీవుడ్‌లోనే కాకుండా బాలీవుడ్‌లోనూ ఆడియెన్స్‌ని మెప్పించింది. అంతేకాకుండా సముద్ర యుద్ధం నేపథ్యంతో తెరకెక్కిన తొలి భారతీయ చిత్రంగానూ మన్ననలు అందుకుంది.

ఇదిలావుంటే, ఇప్పుడీ డైరెక్టర్ మెగా హీరో వరుణ్ తేజ్‌తో తన తర్వాతి సినిమాకు ప్లాన్ చేస్తున్నట్టు తెలుస్తోంది. శ్రీను వైట్ల డైరెక్ట్ చేసిన మిస్టర్ మూవీతో ఈమధ్యే ఆడియెన్స్ ముందుకొచ్చిన వరుణ్ తేజ్‌తో ప్రస్తుతం సంకల్ప్ రెడ్డి చర్చలు జరుపుతున్నట్టు సమాచారం. అయితే, ప్రస్తుతానికి ఈ ప్రాజెక్టుపై ఇంకా ఎటువంటి అధికారిక ప్రకటన వెలువడలేదు. కంచె లాంటి మరో భిన్నమైన చిత్రంలో నటించిన హీరో, ఘాజీ లాంటి చిత్రాన్ని రూపొందించిన డైరెక్టర్ కాంబినేషన్‌లో సినిమా సెట్స్‌పైకి వెళ్తే, అది ఆడియెన్స్‌కి కాస్త ఆసక్తి రేకెత్తించే సినిమానే అవుతుంది.