గోపిచంద్‌కు ‘ఆక్సిజన్’ అవుతుందా?

వరస ఫెయిల్యూర్స్ తో సరైన సక్సెస్ అవసరం అయిన దశలో ఉన్నాడు తొట్టెంపూడి గోపిచంద్. సౌఖ్యం, గౌతమ్ నందా వంటి సినిమాలు ఫెయిల్యూర్స్ గా నిలిచాయి, ఇక ఆరుడగుల బుల్లెట్ విడుదల కాకుండా ఈ హీరోని చికాకు పెడుతోంది. ఇలాంటి నేపథ్యంలో పలు వాయిదాలు పడిన ‘ఆక్సిజన్’ సినిమా ఎట్టకేలకూ ప్రేక్షకుల ముందుకు వస్తోంది. ఈ సినిమా నేడు విడుదల అవుతోంది.

వాస్తవానికి ఈ సినిమాకు తొలి క్లాప్ కొట్టి రెండు సంవత్సరాలు అవుతోంది. ఈ సినిమా దర్శకుడు ప్రముఖ నిర్మాత ఏఎం రత్నం తనయుడు జ్యోతికృష్ణ‌. ఒకవైపు దర్శకుడిగానే కాకుండా తమ తండ్రి నిర్మించే సినిమాలకు ఎగ్జిక్యూటివ్ నిర్మాతగా వ్యవహరిస్తూ ఉంటాడు జ్యోతికృష్ణ‌. ఈ నేఫథ్యంలో ఆక్సిజన్ రూపకల్పన లేట్ అయ్యిందట. ఎలాగైతేనేం.. ప్రారంభమైన రెండేళ్లకు ఈ సినిమాకు మోక్షం లభిస్తోంది. ఇక ఈ సినిమా రిజల్ట్ ప్రేక్షకుల చేతుల్లోనే ఉంది.

బాక్సాఫీసు వద్దకు గత రెండు వారాల్లో ఇరవై సినిమాలకు పైనే వచ్చినా.. వాటిల్లో నిలబడింది ఒకటో అర మాత్రమే. ఇలాంటి నేపథ్యంలో గోపిచంద్ సినిమాకు మంచి అవకాశం ఉంది. ఈ హీరో సినిమాలపై మాస్ కు ఉండే సహజమైన ఆసక్తి ప్లస్ పాయింట్ అవుతోంది. ఇక టైటిల్ మల్టీప్లెక్స్ జనాలనూ ఆకర్షించేలా ఉంది. జగపతిబాబు ఈ సినిమాకు అదనపు ఆకర్షణగా నిలుస్తున్నాడు. ఇది వరకూ జగపతి, గోపిచంద్ కాంబోలో లక్ష్యం వంటి హిట్ సినిమా ఉంది. మరి ఆ సెంటిమెంట్ రిపీట్ అవుతుందేమో చూడాలి.