‘దువ్వాడ జగన్నాథం’కి జీఎస్టీ సెగ!

గత కొన్నిరోజులుగా అందరినీ భయపెడుతున్న విషయం వస్తు సేవల పన్ను (జీఎస్టీ). ఈ పన్ను ఎవరికీ మినహాయింపు కాదు. సినిమా టికెట్ రేట్లపై పన్ను విధానాన్ని గాడిలో పెట్టాలనే ప్రయత్నంలో జీఎస్టీ కౌన్సిల్ ఒక సంచలనాత్మక నిర్ణయం తీసుకుంది. వంద రూపాయల కంటే తక్కువ రేటున్న టికెట్‌పై 18 శాతం, అంతకంటే ఎక్కువ ఉన్న టికెట్‌పై 28 శాతం పన్ను ఖరారు చేసింది. ఇది భారీ చిత్రాలకు పెద్ద దెబ్బ. ఇంతకాలం నామమాత్రపు పన్నులతో తెలుగు చిత్రసీమ బాగానే గడిపేసింది. కానీ ఇకపై పన్నులు తీవ్రంగా ఉండబోతున్నాయి.

ఇక అందులోనూ టికెట్ ధరను పెంచే పెద్ద సినిమాలకు టాక్స్ వాయింపు ఓ రేంజులో ఉండబోతుంది. అయితే ఈ కొత్త పన్ను విధానంలోకి ముందుగా వస్తున్న భారీ చిత్రం 'దువ్వాడ జగన్నాథం'. కాబట్టి ఈ సినిమాపై జీఎస్టీ ప్రభావం బలంగా ఉండే అవకాశాలు ఉన్నాయి. ‘డీజే’ టికెట్ ధరలు పెంచాలని తాజాగా చిత్ర యూనిట్ నిర్ణయించింది. కాబట్టి ‘డీజే’కి పన్ను భారం కూడా అధికంగానే ఉంటుంది. దీని కారణంగా రెగ్యులర్‌గా వచ్చే లాభాల్లో చాలా వరకు కోత పడుతుంది.

అయితే జీఎస్టీ కారణంగా ఎంత నష్టం వస్తుంది..? దీని ప్రభావం ఎంత వరకు ఉంటుందనే విషయాల్లో స్పష్టత మాత్రం ‘డీజే’ సినిమా విడుదలైన తరువాత వస్తుంది. ఈ సినిమాకు విధించే పన్నును బట్టి తరవాత రాబోయే సినిమాల టిక్కెట్ ధరలు ఆధారపడి ఉంటాయి. టికెట్ ధర పెంచి పన్ను కట్టుకునేకన్నా సాధారణ ధరలతోనే వసూళ్లు రాబడదామని సగటు నిర్మాత ఆలోచిస్తాడు కదా..!