ఫైనాన్షియర్ల వేధింపులు... నిర్మాత ఆత్మహత్య!

ఫైనాన్షియర్ల వేధింపులకు తట్టుకోలేక ఓ యువ నిర్మాత ఆత్మహత్యకు పాల్పడ్డాడు. కోలీవుడ్‌కు చెందిన నిర్మాత అశోక్ కుమార్ చెన్నైలోని తన నివాసంలో మంగళవారం ఉరేసుకుని ఆత్మహత్య చేసుకున్నాడు. ప్రముఖ దర్శకుడు, నటుడు శశికుమార్‌‌కు అశోక్ కుమార్ దగ్గర బంధువు. ఫైనాన్షియర్ అన్బుచిజియన్ అధిక వడ్డీ వసూలు చేయడమే కాకుండా, వేధింపులకు పాల్పడినట్లు తన ఆత్మహత్య లేఖలో అశోక్ పేర్కొన్నాడు. స్థానిక ఆర్కాడు రోడ్డు వల్సరవాక్కం ప్రాంతంలో ఓ అపార్ట్‌మెంట్‌లో నివాసముండే అశోక్‌ సహ నిర్మాతగా, కంపెనీ ప్రొడక్షన్‌ సంస్థ‌లో కూడా పనిచేశారు. తీవ్ర అప్పుల్లో కూరుకుపోవడంతో ఈ ఘాతుకానికి పాల్పడ్డాడు. గత ఆరు మాసాలుగా అన్బుచిజియన్ వేధిస్తున్ననట్లు ఆ లేఖలో తెలిపారు.

రాజకీయ నాయకులు, పోలీస్ అధికారులు, చిత్ర పరిశ్రమలోని బడా నిర్మాతల అండదండలు చూసుకుని తనను బెదిరించాడని తెలియజేశాడు. అప్పులు వాళ్ల వేధింపులతో మనస్తాపానికి గురై బలవన్మరణానికి పాల్పడినట్లు పోలీసుల ప్రాథమిక విచారణలో తేలింది. దీనిపై కేసు నమోదు చేసిన పోలీసులు సూసైడ్‌ నోట్‌ ఆధారంగా దర్యాప్తు జరుపుతున్నారు.

నిర్మాత అశోక్ కుమార్ ఆత్మహత్యపై తమిళ నడిగర్ సంఘం అధ్యక్షుడు, హీరో విశాల్ విచారం వ్యక్తం చేశాడు.... ఫైనాన్షియర్ల ఒత్తిడి తట్టుకోలేక ఓ మిత్రుడు ప్రాణాలు తీసుకోవడం చాలా బాధాకరమని అన్నారు. అంతేకాదు ఆర్థిక కారణాలతో చిత్ర పరిశ్రమకు చెందిన వ్యక్తుల బలవన్మరణాలలో ఇదే చివరిది కావాలని కోరుకుంటున్నానని విశాల్ ఆవేదన చెందారు. ప్రతి సమస్యకు ఆత్మహత్యే పరిష్కారం కాదని, ఫైనాన్షియర్ల నుంచి ఇలాంటి వేధింపులు ఎదురైతే నిర్మాతలు తమకు తెలియజేయాలని అర్థిస్తున్నానని, వారికి సహాయం చేయడానికి ఎప్పుడూ ముందుకు వస్తామని ఆయన తెలిపారు.

అశోక్ ఆత్మహత్యపై హీరో సిద్ధార్థ్ కూడా స్పందించారు. అప్పుల్లో కూరుకుపోయి ఆత్మహత్య చేసుకోవడం కలచివేస్తోందని అన్నారు. మరో నిర్మాత కానీ.. రైతన్న కానీ ఇలా ఆత్మహత్య చేసుకుని చనిపోకూడదని ఆయన ఆవేదన వ్యక్తం చేశారు. "అప్పుల ఒత్తిడి కారణంగా ఒక యువ నిర్మాత చనిపోయాడని వినడానికే చాలా బాధగా ఉంది. తమిళ సినిమా పూర్తిగా అప్పుల్లో ఉంది కానీ ప్రపంచమంతా సక్సెస్.. ఫేమ్ గురించి అబద్ధం చెప్తున్నామని భావిస్తోంది... ఇలాంటి వ్యవస్థ మారాలి. రైతు కానీ.. ఓ ఫిల్మ్ మేకర్ కానీ ఆత్మహత్య చేసుకోవడం శాపం. శశికుమార్ కుటుంబానికి నా ప్రగాఢ సానుభూతి తెలియజేస్తున్నానని సిద్దార్థ్ ట్వీట్ చేశారు.