​బాహుబలితో అతడెంత సంపాదించాడంటే...!

బాహుబలి - ది బిగినింగ్, ది- కంక్లూజన్ లను హిందీ వెర్షన్ లో విడుదల చేసింది దర్శకనిర్మాత కరణ్ జోహార్ అని ప్రత్యేకంగా చెప్పనక్కర్లేదు. హిందీ చిత్రసీమలో ప్రముఖుడు అయిన కరణ్ సమర్పకుడిగా మారడంతో బాహుబలి కి అక్కడ క్రేజ్ మొదలైంది. ఫస్ట్ పార్ట్ విడుదల అయ్యాకా ఆ క్రేజ్ అమాంతం పెరిగిపోయింది. సెకెండ్ పార్ట్ కోసం హిందీ జనాలు ఎంతగానో ఎదురుచూశారు, బాహుబలి- ది కంక్లూజన్ కు సంచలన విజయాన్ని ఇచ్చారు.

మరి బాహుబలి బాలీవుడ్ లో భారీ విజయాన్ని సొంతం చేసుకోవడంతో కరణ్ జోహార్ పంట పండినట్టుగా తెలుస్తోంది. ఈ సినిమా హిందీ వెర్షన్ అధికారికంగా ఐదువందల కోట్ల రూపాయల మార్కును దాటింది. గ్రాస్ వసూళ్లు ఆ స్థాయిలో ఉన్నాయి. మరి గ్రాస్ ఈ స్థాయిలో ఉన్న నేపథ్యంలో కరణ్ కు మిగిలేదెంత? అనేది ఆసక్తికరంగా మారింది.

ఈ సినిమా కోసం తన పేరును మాత్రమే కరణ్ పెట్టుబడిగా పెట్టాడు. మరి దానికే ఏకంగా పాతిక కోట్ల రూపాయల వరకూ ఈయనకు దక్కుతోందని సమాచారం. బాహుబలి గ్రాస్ వసూళ్లు ఐదువందల కోట్లు కాగా, నిర్మాత దగ్గరకు కనీసం 250 కోట్లు అయినా వస్తాయనేది ట్రేడ్ పండితుల అంచనా. ఒప్పందం ప్రకారం.. ఇలా వచ్చే మొత్తంలో పది శాతం కరణ్ కు దక్కాలట. హిందీ వెర్షన్ నిర్మాతకు సంపాదించిపెట్టే మొత్తంలో పది శాతం కరణ్ కు దక్కుతుంది. అంటే ఈ లెక్క కనీసం పాతిక కోట్ల రూపాయలు కరణ్ జేబుకు చేర్చినట్టుంది.