అమ్మ కడచూపు దక్కని అజిత్

తమిళ హీరో అజిత్‌కు జయలలిత అంటే చాలా అభిమానం. జయలలిత కూడా అజిత్‌ను కొడుకులా భావిస్తారట. జయ మరణించిన సంగతి ప్రకటించే సమయానికి అజిత్ బల్గేరియాలో సినిమా షూటింగ్ లో ఉన్నారు. విషయం తెలిసిన వెంటనే అక్కణ్నించి బయలుదేరారు. చెన్నై చేరేసరికి మంగళవారం అర్ధరాత్రయిపోయింది. అప్పటికి జయ అంత్యక్రియలు పూర్తయిపోయాయి. అమ్మ కడచూపు దక్కకపోవడంతో అజిత్ చాలా బాధపడ్డారు. విమానాశ్రయం నుంచే నేరుగా భార్య షాలినితో సహా జయ అంత్యక్రియలు జరిగిన ప్రాంతానికి వెళ్లి నివాళులర్పించారు. ఈ తరుణంలో అన్నాడీఎంకే పార్టీలో అజిత్ చేరవచ్చనే ఊహాగానాలు వినిపిస్తున్నాయి.

ఒకానొక దశలో జయలలిత తన రాజకీయ వారసుడిగా అజిత్ ఉండాలని కోరుకున్నట్టు కూడా పార్టీ వర్గాలు చెప్పాయి. జయలలిత అజిత్ ను సొంత కొడుకులా చూసుకుంటారన్న విషయం పార్టీ నేతలకు తెలుసు. అతని పెళ్లికి జయ స్వయంగా హాజరయ్యారు కూడా.