Mahesh Koneru: ఇది వ్యక్తిగతంగా తీర్చలేని లోటు.. భావోద్వేగంతో ట్వీట్ చేసిన కళ్యాణ్ రామ్

టాలీవుడ్‌ నిర్మాత, ఎన్టీఆర్‌ పీఆర్‌ఓ మహేశ్‌ కోనేరు మృతి చెందిన విషయం తెలిసిందే. మంగళవారం ఉదయం విశాఖపట్నంలోని ఆయన నివాసంలో ఆయనకు ఛాతిలో నొప్పి రావడంతో కుటుంబ సభ్యులు స్థానిక ఆసుపత్రికి తరలించారు. అయితే ఆ ఆస్పత్రిలో చికిత్స పొందుతూనే మహేశ్‌ తుదిశ్వాస విడిచారు. ఆయన హఠాన్మరణంతో టాలీవుడ్‌ పరిశ్రమ షాక్‌ గురయ్యింది. ఎన్టీఆర్‌కు ఆయన పీఆర్వోగా ఉండటంతో తారక్ ఎంతో భావోద్వేగానికి గురి అయ్యారు. ఆయన లేని లోటును ఎవరు తీర్చలేరు అంటూ ఎన్టీఆర్ పేర్కొన్నారు.

అయితే ఆయన మృతిపై తాజాగా నందమూరి కళ్యాణ్‌రామ్ స్పందించారు. ‘మహేష్ కోనేరు మరణించారు అనే వార్తను ఇప్పటికి నమ్మలేకపోతున్న. ఇది వ్యక్తిగతంగా తీరని లోటు. ఒక మంచి మిత్రుడిగా, కుటుంబ సభ్యుడిగా, శ్రేయోభిలాషిగా ఆయన మాకు ఎంతో చేరువగా ఉన్నారు. ఆయన ఎంతో కాలంగా మాకు వెన్నుమూకగా ఉన్నారు. ఏదీ ఏమైనా ఆయన మరణం.. సినీ పరిశ్రమకు తీరని లోటు.. ఆయన కుటుంబ సభ్యులకు, దగ్గరి వాళ్లకు నా ప్రగాఢ సానుభూతి’ అంటూ కళ్యాణ్ రామ్ ట్వీట్ చేశారు.

ఈస్ట్ కోస్ట్ ప్రొడక్షన్స్ అనే బ్యానర్‌ను స్టార్ట్ చేసి కళ్యాణ్ రామ్‌తో నా నువ్వే, 118 చిత్రాలతో పాటు కీర్తిసురేశ్‌తో మిస్ ఇండియా, సత్యదేవ్‌తో తిమ్మరుసు చిత్రాలను మహేష్ కోనేరు నిర్మించారు. అలాగే తమిళంలో విజయ్, అట్లీ కాంబినేషన్‌లో వచ్చిన బిగిల్ చిత్రాన్ని తెలుగులో ‘విజిల్’ పేరుతో విడుదల చేశారు. ఆయన జర్నలిస్ట్‌గా కెరీర్ స్టార్ట్ చేశారు. తర్వాత సినిమాలకు పి.ఆర్.ఓగా మారారు. తర్వాత నిర్మాతగా మారారు. ఎన్టీఆర్, కళ్యాణ్ రామ్‌లకు ఆయన పర్సనల్ పి.ఆర్‌గా వ్యవహరించారు. ఆయన హఠాన్మరణంపై సినీ ప్రముఖులు తీవ్ర దిగ్భ్రాంతి వ్యక్తం చేశారు.