ఫ్యాన్స్‌కు సర్‌ప్రైజ్ ఇచ్చిన కమల్‌హాసన్.. భావోద్వేగంతో కన్నీళ్లు

లైఫ్‌లో ఒక్కసారైన తమ అభిమాన హీరోను చూడాలని ఎందరో అభిమానులు కలలు కంటుంటారు. కనీసం దూరం నుంచి అయినా చూస్తే చాలని అనుకుంటారు. అలాంటిది తమ ఫేవరెట్ స్వయంగా వచ్చి సర్‌ప్రైజ్ ఇస్తే.. హగ్ చేసుకుని అభినందనలు తెలిపితే.. ఇక ఆ అభిమానుల ఆనందానికి అవధులు ఉంటాయా..? కాళ్లు భూమ్మిద నిలబడతాయా..? లోకనాయకుడు కమల్‌హాసన్ తన అభిమానులకు హఠాత్తుగా కనిపించి.. వారిని ఆశ్చర్యంలో ముంచెత్తారు.

కమల్‌హాసన్ హీరోగా నటించిన లేటెస్ట్ మూవీ ‘విక్రమ్ హిట్ లిస్ట్’. కనకరాజ్ డైరెక్షన్‌లో రూపొందిన ఈ సినిమాలో విజయ్ సేతుపతి, ఫహాద్ ఫాజిల్ కీలక పాత్రల్లో యాక్ట్ చేశారు. హీరో సూర్య అతిథిపాత్రలో నటించారు. ఇప్పటికే విడుదలైన ట్రైలర్‌కు ఫ్యాన్స్‌ నుంచి భారీ రెస్పాన్స్ వస్తోంది. ఈ మూవీ ట్రైలర్‌ను తెలుగులో రామ్ చరణ్ రిలీజ్ చేశారు. జూన్ 3న ప్రపంచవ్యాప్తంగా విడుదుల కానున్న ఈ మూవీకి సంబంధించి ప్రమోషన్స్ షురూ చేశారు.

ఈ సందర్భంగా అభిమానులు 'విక్రమ్' సినిమాకు ప్రమోషన్ కార్యక్రమాలు నిర్వహించారు. ఒక్కొక్కరు తమ అభిమాన నాయకుడు కమల్‌హాసన్ గురించి పొగుడుతూ ఉండగా.. వారిని వెనుక నుంచి వచ్చి మాట్లాడించారు. లోకనాయకుడే తమను అనుకోకుండా పలకరించడంతో ఫ్యాన్స్ ఆనందంతో ఉబ్బితబ్బిబయ్యారు. గూస్‌బంప్స్ రావడంతో తాము కలలో ఉన్నామేమో అని అనుకున్నారు. ఓ అభిమాని కన్నీళ్లు పెట్టుకున్నాడు. వారితో ఎంతో ప్రేమగా మాట్లాడిన కమల్.. వారికి షేక్ హ్యాండ్ ఇచ్చి హాగ్ చేసుకున్నారు. ఇందుకు సంబంధించిన వీడియో సోషల్ మీడియాలో వైరల్‌గా మారింది.