ఫ్యామిలీ పేర్ల వెనుక ‘నాగ’ రహస్యాన్ని చెప్పిన నాగార్జున!

అక్కినేని నాగేశ్వరరావు, నాగార్జున, నాగ సుశీల, నాగచైతన్య.. వీరి పేర్లకు ముందు ‘నాగ్‌’ కామన్‌గా ఉంటుంది. దీనికి కారణమేంటో తెలుసా.. ఇలా ‘నాగ్‌’ వచ్చేలా తమ పేర్లను ఎందుకు పెట్టారో తాజాగా హీరో నాగార్జున వివరించారు. ‘నాన్న (నాగేశ్వరరావు) నానమ్మ కడుపులో ఉన్నప్పుడు రోజూ కలలో నాగుపాము వచ్చేదట. నాన్న పుట్టిన తర్వాత ఇంకా పేరు కూడా పెట్టని కొద్ది రోజులకే.. ఓ రోజు పాలు ఇస్తుండగా నానమ్మకు నాగుపాము పిల్ల కనిపించిందట. అందుకని నాగేశ్వరరావు అని పెట్టారు. ఆ తర్వాత అది నాకు, నాగ సుశీలకు.. ఇలా అందరికీ కొనసాగింది.’ అని నాగార్జున చెప్పుకొచ్చారు.

చైతూ పుట్టిన తర్వాత చైతన్య అని పేరు పెట్టారట. అప్పుడు నాగార్జున వాళ్ల అమ్మగారు పిలిచీ మరీ చెప్పారట.. నాగ్‌ జత చేయమని. దీంతో నాగచైతన్యగా మార్చామని నాగార్జున వివరించారు. సోదరి నాగసుశీలతో కలిసి నాగార్జున ఓ ఇంటర్వ్యూలో మాట్లాడారు. ఈ సందర్భంగా ఈ రహస్యాన్ని వివరించారు.