రాజకీయాల్లోకి రాజోలు పాప.. క్లారిటీ ఇదిగో!

కోనసీమ బ్యూటీ.. టాలీవుడ్ సీతమ్మ అంజలి అచ్చతెలుగు అమ్మాయిగా ప్రేక్షకులను పలు సినిమాలతో అలరించింది. అయితే తెలుగులో అవకాశాలు అంతంతమాత్రంగానే ఉండటంతో తమిళ ఇండస్ట్రీకి వెళ్లి అక్కడ బిజీ హీరోయిన్‌గా మారింది. అప్పుడప్పుడు తెలుగు సినిమాల్లో కూడా మెరుస్తుంది. మొన్నటివరకు హీరో జై తో డేటింగ్ చేస్తోందంటూ.. వార్తల్లో నిలిచిన అంజలి.. ఇప్పుడు మరోసారి వార్తల్లో నిలిచింది. ఈసారి టాపిక్ ప్రేమ కాదు.. రాజకీయాలు. అతి త్వరలోనే అంజలి రాజకీయాల్లోకి వెళ్లబోతుందంటూ తమిళనాట ఓ వార్త హల్ చల్ చేస్తోంది

కథానాయికలు రాజకీయాల్లో చేరడం పాత విషయమే.. రోజా, నగ్మా, ఖుష్బూ, తాజాగా నమిత ఇప్పటికే రాజకీయాల్లో కొనసాగుతున్నారు. ఇప్పుడు ఆ లిస్ట్‌లో కొత్తగా అంజలి కూడా చేరే అవకాశాలు ఉన్నాయంటూ ప్రచారం జరుగుతోంది. ఆమెపై ఈ రకమైన వార్తలు రావడానికి ఓ కారణముంది. తాజాగా ఆమె నటించిన 'బెలూన్' సినిమా ప్రమోషన్స్‌లో పాల్గొన్న అంజలి తనకు రాజకీయాలంటే చాలా ఇష్టమని, రెగ్యులర్‌గా పాలిటిక్స్ అప్ డేట్స్ ఫాలో అవుతానని, ఈ మధ్య పార్లమెంట్‌ను కూడా సందర్శించానని చెప్పుకొచ్చింది అంజలి.

దీంతో అప్పటినుండి ఆమె రాజకీయాల్లోకి వెళ్లబోతుందంటూ.. ప్రముఖ రాజకీయ పార్టీలో చేరబోతున్నట్లు సోషల్ మీడియాలో వైరల్ అయింది. అయితే తనకు రాజకీయాలు అంటే ఇంట్రస్ట్ మాత్రమే అన్నానని.. తనకు ప్రస్తుతానికి రాజకీయాల్లోకి రావాలనే ఆలోచన లేదని క్లారిటీ ఇచ్చేసింది ఈ బ్యూటీ. ఇకనైనా.. ఈ వార్తలకు బ్రేక్ పడుతుందేమో చూడాలి.