ఝజజజ... రాణి ముఖర్జీ ‘హిచ్‌కీ’!

బాలీవుడ్ నటి రాణి ముఖర్జీ మళ్లీ రంగంలోకి దిగింది. ‘హిచ్‌కీ’ అంటూ వస్తున్న ఆమె ఈ సినిమాలో చాలా భిన్నంగా కనిపించనుంది. సిద్ధార్థ్‌ పి.మల్హోత్రా దర్శకత్వంలో రూపొందించిన ఈ సినిమా ట్రైలర్ మంగళవారం విడుదలైంది. ఇందులో రాణి ముఖర్జీ.. నైనా మాథూర్ అనే టీచర్‌గా కనిపిస్తుంది. టూరెట్‌ సిండ్రోమ్‌ అనే అలవాటుతో వింతగా ప్రవర్తించే ఆమె చిన్నారులకు చదువు ఎలా చెబుతుందనేదే ఇందులో ట్వీస్టు. మాటల మధ్యలో ఆమె బుర్ర పక్కకి తిప్పి ‘‘ఝ.. జజజ’’ అంటూ అరుస్తుంది. దీంతో విద్యార్థులు ఆమెను ఎగతాళి చేస్తూ, ఆటపట్టిస్తుంటారు. మొండిగా ఉండే ఆ విద్యార్థులను రాణి ఎలా గాడిలో పెడుతుందనేది ఈ సినిమా కథాంశం.

యాష్‌రాజ్ ఫిలింస్‌ బ్యానర్‌పై ఈ చిత్రాన్ని రాణి భర్త ఆదిత్య చోప్రా, మనీశ్‌ శర్మ నిర్మిస్తున్నారు. 2018 ఫిబ్రవరి 23న ఈ సినిమా విడుదల కానుంది. దాదాపు మూడేళ్ల తర్వాత రాణి ఈ సినిమాలో నటించారు. 2014లో వచ్చిన ‘మర్దానీ’ తర్వాత మళ్లీ ఆమె ఈ సినిమా చేయలేదు. అయితే, ‘హిచ్‌కీ’ అన్నివర్గాల ప్రేక్షకులకు నచ్చుతుందని దర్శక నిర్మాతలు అంటున్నారు.
‘హిచ్‌కీ’ ట్రైలర్