నాపై వచ్చే గాసిప్స్‌ను గమనిస్తా!

సోషల్ మీడియాలో తనపై జరిగే గాసిప్స్ ప్రచారాన్ని అంతా తను గమనిస్తుంటానని చెప్పింది శ్రుతి హాసన్. తను ఈ జనరేషన్ అమ్మాయిని అని, సోషల్ మీడియాలో యాక్టివ్ గా ఉంటాను అని, ఇలాంటి నేపథ్యంలో తనపై ఎవరు ఎలాంటి ప్రచారాన్ని చేస్తున్నా.. అవి తన వరకూ సహజంగానే వస్తాయని శ్రుతి చెప్పింది. శ్రుతి ఈ అంశంపై ఎందుకు స్పందించింది అంటే.. దీని వెనుక ఆమెపై తాజాగా వచ్చిన ఒక వార్త ఉంది.

శ్రుతిహాసన్ ఒక కన్నడ చిత్రంలో నటించబోతోందని ఇటీవల వార్తలు వచ్చాయి. ‘పొగరు’ పేరుతో రూపొందే ఆ సినిమాలో శ్రుతి నటిస్తున్నట్టుగా ప్రచారం జరిగింది. ముందుగా సోషల్ మీడియాలో, వెబ్ సైట్ల ద్వారా ప్రచారం పొందిన ఆ వార్తను ఆ తర్వాత సినిమా పత్రికలుకూడా రాశాయి. అయితే అదంతా అబద్ధమట!

ఈ విషయాన్ని స్వయంగా శ్రుతి హాసనే చెప్పింది. ‘నేను ఏ కన్నడ సినిమాలోనూ నటించడం లేదు.. కన్నడలో నటించమని కూడా ఎవరూ నా దగ్గరకు ప్రతిపాదనతో రాలేదు. కానీ.. నేను శాండల్ వుడ్ సినిమాలో నటిస్తున్నట్టుగా ప్రచారం జరుగుతోంది. సోషల్ మీడియాలో జరుగుతున్న ప్రచారం నా వరకూ వచ్చింది. అది పూర్తిగా అబద్ధం..’ అని శ్రుతి స్పష్టం చేసింది.

ఇదే సమయంలో తను సోషల్ మీడియాలో యాక్టివ్ గా ఉంటానని శ్రుతి చెప్పింది. తన గురించి ఎవరు ఎలాంటి రూమర్ ను స్ప్రెడ్ చేసినా.. తనకు తెలిసిపోతుందంది.