నాపై మరింత బాధ్యత పెరిగిందన్న సమంత అక్కినేని

అక్కినేని నాగచైతన్యతో పెళ్లయిన తర్వాత తన పేరు చివరన తన ఇంటి పేరు అక్కినేనిని చేర్చుకున్న సమంత తాజాగా రాజుగారి గది 2 ప్రెస్‌మీట్‌ ద్వారా మొదటిసారిగా మీడియాకు దర్శనం ఇచ్చింది. రేపు థియేటర్లలోకి రానున్న ఈ సినిమా విశేషాలని మీడియా ద్వారా అభిమానులు, ఆడియెన్స్‌తో పంచుకునేందుకు మూవీ యూనిట్‌తోపాటు మామ అక్కినేని నాగార్జునతో కలిసి ఇవాళ సాయంత్రం మీడియా ముందుకొచ్చింది సమంత. ఈ సందర్భంగా మీడియాతో ముచ్చటించిన సమంతను అక్కినేని కుటుంబంలో ఒకరవడం అనేది ఎలా వుంది అని అడిగింది.

మీడియా అడిగిన ఈ ప్రశ్నకు టక్కున స్పందించిన సమంత.. అక్కినేని కుటుంబంలో ఒకరిగా వుండటం అనేది తనపై మరింత బాధ్యతను పెంచిందని అన్నారు. అందరూ కోరుకున్నట్టుగానే తాను నడుచుకుంటానని ఆశిస్తున్నట్టు స్పష్టంచేసింది సమంత. అక్కినేని కుటుంబంలో పురుషులకి మహిళలని కూడా తమతో సమానంగా చూసే అలవాటుంది. అక్కినేని కుటుంబంలో మహిళలకి అన్నివిధాల స్వేచ్ఛ వుంది. నాకూ అలాగే సినిమాలు చేసుకోమంటూ స్వేచ్ఛ ఇచ్చారు. అక్కినేని కుటుంబానికి వున్న గొప్ప లక్షణాల్లో ఇదీ ఒకటి అని అన్నారామె. అప్పుడే అత్తాగారింటి గురించి సమంత ఎంత గొప్పగా చెప్పేస్తుందో చూడండి!