Pelli SandaD Pre Release Event: ఆ అవకాశం నాకు దక్కలేదని బాధ ఉంది.. కానీ..: దిల్ రాజు

సీనియర్ డైరెక్టర్, దర్శకేంద్రుడు రాఘవేంద్ర రావు దర్శకత్వం పర్యవేక్షణలో‘పెళ్లి సందD’ సినిమా రూపొందతున్న సంగతి తెలిసిందే. గత 25 ఏళ్ల క్రింద ఇదే ‘పెళ్లి సందడి’ పేరుతో సినిమా తీసి రికార్డులు తిరగరాసిన ఆయన.. ఇప్పుడు మోడ్రన్ ‘పెళ్లి సందD’తో తెలుగు ప్రేక్షకుల ముందుకు రాబోతున్నారు. ఈ సినిమా ద్వారా రాఘవేంద్ర రావు శిష్యురాలు గౌరి రోనంకి దర్శకురాలిగా పరిచయం అవుతున్నారు. ఈ సినిమాలో శ్రీకాంత్ కుమారుడు రోషన్ హీరోగా నటిస్తుండగా.. శ్రీ లీలా హీరోయిన్‌గా పరిచయం అవుతోంది. దసరా కానుకగా ఈ సినిమా అక్టోబర్‌ 15వ తేదీన విడుదల కానుంది. ఇక అప్పట్లో ‘పెళ్లి సందడి’ సినిమాకు సంగీతం అందించిన ఎంఎం కీరవాణి ఈ సినిమాకు సంగీతం అందిస్తున్నారు.

అయితే ఈ సినిమా ప్రీ రిలీజ్ ఈవెంట్ ఆదివారం ఘనంగా జరిగింది. ఈ ఈవెంట్‌లో దిల్‌రాజు మాట్లాడుతూ.. రాఘవేంద్ర రావు గారి ఏవీ చూసిన వెంటనే తనకు వైబ్రేషన్స్ వచ్చాయి అని అన్నారు. ఎందరో స్టార్‌లను రాఘవేంద్ర రావు ఇండస్ట్రికి పరిచయం చేశారని.. తెలుగు సినిమా చరిత్రలో ఆయన పేరు చిరస్థాయిలో నిలిచిపోతుందని పేర్కొన్నారు. ఇక తన బ్యానర్‌లో రాఘవేంద్ర రావుతో సినిమా చేసే అవకాశం దొరకలేదు అని ఆయన బాధపడ్డారు. అందుకు తాను ఇండస్ట్రీలోకి లేటుగా ఎంట్రీ ఇవ్వడమే కారణమని అన్నారు. అయితే తొలిసారిగా రాఘవేంద్ర రావును నటుడిగా పరిచయం చేసే అవకాశం కోల్పోయాను అని ఆయన పేర్కొన్నారు.

‘శతమానం భవతి’ సినిమాలో తాత పాత్ర కోసం నటించాలని ఆయన్ని అడిగాను అని.. కానీ అప్పుడు యాక్టింగ్ అంటే భయపడి ఆయన అందుకు ఒప్పుకోలేదు అని చెప్పారు. అయితే తాను అడిగినప్పుడు చేయకపోయినా.. ఇప్పుడు ఆయన స్క్రీన్‌మీద కనిపిస్తున్నందుకు సంతోషంగా ఉందని ఆయన అన్నారు. ఇక తాను ఇప్పటికే దాదాపు 50 సినిమాలు నిర్మించాను అని.. కానీ, ఈ సినిమా స్టోరీ విషయంలో రాఘవేంద్ర రావుతో చర్చించిన సమయంలో ఆయన చెప్పిన సలహాలు ఎంతో ఉపయోగపడుతున్నాయి అని ఆయన పేర్కొన్నారు. ఇక ఈ సినిమా మంచి సక్సెస్ సాధించాలని.. హీరోహీరోయిన్, దర్శకురాలికి ఆయన శుభాకాంక్షలు తెలిపారు.