ఎన్టీఆర్‌తో టాప్ హీరోయిన్‌ ఐటెం సాంగ్‌..?

టాలీవుడ్ టాప్ హీరోయిన్స్ అందరూ ఐటెం సాంగ్‌ చేసేందుకు వరుసగా ఆసక్తి కనబరుస్తున్నారు. ఇప్పటికే తమన్నా, శ్రుతి హాసన్, కాజల్ అగర్వాల్ స్పెషల్ సాంగ్స్‌తో వెండితెరపై సందడి చేయగా.. తాజాగా మరో టాప్ హీరోయిన్ రకుల్‌ప్రీత్ సింగ్ ఈ జాబితాలో చేరనున్నట్లు సమాచారం. బాబీ దర్శకత్వంలో ఎన్టీఆర్ నటిస్తున్న ‘జై లవ కుశ’ సినిమాలో రకుల్‌ప్రీత్ ఐటెం సాంగ్ చేసేందుకు అంగీకరించిందట. ఈ చిత్రానికి దేవిశ్రీ ప్రసాద్ సంగీతం సమకూరుస్తుండగా ఎన్టీఆర్ ఆర్ట్స్ బ్యానర్‌పై నందమూరి కల్యాణ్ రామ్ నిర్మిస్తున్నారు.


రకుల్‌ప్రీత్ సింగ్ ఇప్పటికే ఎన్టీఆర్‌ సరసన ‘నాన్నకు ప్రేమతో’ సినిమాలో నటించింది. ఆ చనువుతోనే చిత్ర యూనిట్ సంప్రదించగా రకుల్ అంగీకరించినట్లు తెలుస్తోంది. గత ఏడాది విడుదలైన జనతా గ్యారేజ్ సినిమాలో కాజల్ అగర్వాల్ చేసిన ఐటెం సాంగ్ ‘పక్కా లోకల్’ సూపర్ హిట్ కావడంతో ఎన్టీఆర్ అదే తరహాలో మరో పాటను సిద్ధం చేయాల్సిందిగా దేవిశ్రీ‌కి సూచించినట్లు సమాచారం. మరి చూడాలి ఐటెం సాంగ్‌లో రకుల్ ఎలా అందాలను కనువిందు చేస్తుందో.. !