'ఉయ్యాలవాడ నర్సింహా రెడ్డి' గ్రామంలో సురేందర్ రెడ్డి

మెగాస్టార్ చిరంజీవి హీరోగా ప్రముఖ స్వాతంత్య్ర సమరయోధుడు ఉయ్యాలవాడ నరసింహా రెడ్డి రియల్ స్టోరీ ఆధారంగా సెట్స్‌పైకి వెళ్లనున్న సై రా మూవీని చూసి యావత్ దేశం గర్విస్తుందని అభిప్రాయపడ్డాడు ఆ సినిమాను డైరెక్ట్ చేయనున్న దర్శకుడు సురేందర్ రెడ్డి. డిసెంబర్ మొదటి వారంలో ఈ సినిమా పట్టాలెక్కనున్న నేపథ్యంలో నిన్న శనివారం నాడు సురేందర్ రెడ్డి, సినిమాటోగ్రాఫర్ రత్నవేలు ఇద్దరూ కర్నూలు జిల్లాకు చెందిన ఉయ్యాలవాడ నరసింహా రెడ్డి స్వగ్రామమైన ఉయ్యాలవాడను సందర్శించారు. ఈ సందర్భంగా ఉయ్యాలవాడ వారసులు, గ్రామస్తులతో మాట్లాడుతూ సురేందర్ రెడ్డి ఈ వ్యాఖ్యలు చేశారు.

ఉయ్యాలవాడ నరసింహా రెడ్డి జీవితంలో చోటుచేసుకున్న ప్రధాన ఘట్టాలకి సంబంధించిన ప్రాంతాలని డైరెక్టర్ సూరి, రత్నవేలు పరిశీలించారు. ఉయ్యాలవాడ గ్రామం ముఖద్వారం, పొలిమేరలు, నర్సింహా రెడ్డి పూర్వీకుల నివాసం, రూపనగుడి గ్రామంలో వున్న అతడి ఖడ్గం, ఉయ్యాలవాడ నర్సింహా రెడ్డి నిత్యం పూజలు జరిపిన దుర్గా మాత గుడి, బ్రిటీషర్లు అతడిని ప్రాణాలతో పట్టుకున్న చోటు అయిన జగన్నాథ గుట్టతోపాటు చివరిగా ఆ ఫ్రీడం ఫైటర్‌ని ఉరి తీసిన కోయిలకుంట్ల గ్రామాన్ని కూడా సందర్శించారు.