ఇంట్రస్టింగ్: మహేష్ బావ.. ‘సమ్మోహనం’!

రెగ్యులర్ సినిమాలకు భిన్నంగా కొత్త కథా, కథనాలతో సినిమాలు చేస్తుంటారు దర్శకుడు ఇంద్రగంటి మోహన్ కృష్ణ. ఇటీవల కాలంలో ఆయన తెరకెక్కించిన 'జెంటిల్ మెన్', 'అమీతుమీ' వంటి సినిమాలు బాక్సాఫీస్ వద్ద మంచి విజయాలను అందుకున్నాయి. అదే జోరుతో ఈ దర్శకుడు ప్రస్తుతం సుధీర్ బాబు (మహేష్ బాబు బావ) హీరోగా ఓ సినిమాను తెరకెక్కిస్తున్నాడు. ఇటీవలే ఈ సినిమా పూజా కార్యక్రమాలు జరుపుకున్న ఈ చిత్రాన్ని రొమాంటిక్, కామెడీ జోనర్‌లో రూపొందిస్తున్నారు. గతంలో సుధీర్ బాబు, నందిత హీరోహీరోయిన్‌లుగా నటించిన ‘ప్రేమకథా చిత్రమ్’ ఇదే జానర్‌లో విడుదలై సంచలన విజయాన్ని సాధించింది.

అయితే తాజాగా సుధీర్ బాబు-ఇంద్రగంటి కాంబినేషన్‌లో వస్తున్న తాజా చిత్రానికి 'సమ్మోహనం' అనే క్యాచీ టైటిల్‌ను పరిశీలిస్తున్నారు. మొదటినుండి కూడా ఇంద్రగంటి తన సినిమాలకు అర్ధవంతమైన పేర్లను టైటిళ్ళుగా పెట్టుకుంటున్నాడు. ఇదే క్రమంలో 'సమ్మోహనం' అనే టైటిల్‌ను ఎంపిక చేసుకున్నాడు. శివలెంక కృష్ణప్రసాద్ నిర్మిస్తోన్న ఈ సినిమా షూటింగ్ చివరి దశలో ఉంది. మరోవైపు పోస్ట్ ప్రొడక్షన్ పనులు కూడా జరుగుతున్నాయి. ఈ సినిమాలో అతిథి రావు హైదరి హీరోయిన్‌గా కనిపించనున్నారు.