ఆ సలహా ఇచ్చింది మహేష్‌బాబే: బిగ్‌బాస్ 2 విజేత కౌశల్

కౌశల్.. కౌశల్.. కౌశల్.. గత కొద్ది రోజులుగా ఎక్కడ చూసినా ఈ పేరు మార్మోగింది. బిగ్‌బాస్ షోతో కౌశల్‌కు తెలుగు రాష్ట్రాల్లోనే కాకుండా దేశవిదేశాల నుంచి కూడా మద్దతు లభించింది. ఆ క్రేజే.. అతన్ని బిగ్‌బాస్ సీజన్ 2 విజేతగా నిలిపింది. అయితే, కౌశల్‌కు హీరో మహేష్ బాబు ప్రత్యేకంగా విష్ చేయడం అందరికీ ఆశ్చర్యం కలిగించింది.

దీనిపై కౌశల్ స్పందిస్తూ.. మహేష్ బాబుతో తనకు ఉన్న అనుభవం ఇప్పటిది కాదని, తాను ఈ స్థాయికి చేరడానికి ఆయనే కారణమని తెలిపారు. మహేష్ బాబు ఇచ్చిన సలహా మేరకు తాను ఆంధ్రప్రదేశ్‌లో మోడల్ ఏజెన్సీ ప్రారంభించానన్నారు. ఇందుకు దర్శకుడు కె.రాఘవేంద్ర రావు కూడా సహకరించారని తెలిపారు.

మహేష్ బాబు అప్పట్లో ఆ సలహా ఇచ్చి ఉండకపోతే తన స్వస్థలమైన విశాఖపట్నంలో స్థిరపడేవాడనని, ఈ రోజు ఈ స్థానంలో ఉన్నానంటే కారణం ఆయనేనని కౌశల్ పేర్కొన్నారు. ‘రాజకుమారుడు’ సినిమా నుంచి తనకు మహేష్ బాబుతో పరిచయం ఉందని కౌశల్ తెలిపారు. బిగ్‌బాస్ విజేతగా నిలిచిన తర్వాత మహేష్ బాబు తనను ప్రత్యేకంగా అభినందించడం చాలా సంతోషంగా ఉందన్నారు.