పవన్‌పై జగన్ వ్యాఖ్యలు.. నాగబాబు రియాక్షన్!

జనసేన అధినేత పవన్ కల్యాణ్‌పై వైసీపీ అధ్యక్షుడు వైఎస్ జగన్మోహన్ రెడ్డి వ్యక్తిగత విమర్శలు గుప్పించిన విషయం తెలిసిందే. కొత్త కారు మార్చేసినట్టు పవన్‌ కల్యాణ్ నాలుగైదేళ్లకు ఓసారి భార్యను మార్చేస్తారంటూ వైసీపీ అధినేత వివాదాస్పద వ్యాఖ్యలు చేశారు. జగన్ వ్యాఖ్యలపై నటుడు నాగబాబు ఘాటుగా స్పందించారు. ఓ టీవీ చానెల్ ఇంటర్వ్యూలో మాట్లాడిన నాగబాబు.. పవన్‌ను ఎదుర్కొనే సత్తాలేకే జగన్ వ్యక్తిగత విమర్శలకు దిగుతున్నారని ధ్వజమెత్తారు. ఓ పార్టీ అధినేతగా నోరు జారడం ఆయనకు తగదని హితవు పలికారు. మిగతావారు విమర్శించడం వేరు, ఓ పార్టీ అధినేతగా జగన్ మాట్లాడడం వేరని వ్యాఖ్యానించారు. వ్యక్తిగత విమర్శల ద్వారా పవన్ వ్యక్తిత్వాన్ని దెబ్బ తీసే ప్రయత్నం జరుగుతోందని నాగబాబు ఆవేదన వ్యక్తం చేశారు.

తాము ఎంతగా వద్దని వారించినా వినకుండా ప్రజలకు సేవచేయడం కోసమే పవన్ రాజకీయాల్లోకి వచ్చాడని ఆయన తెలియజేశారు. తప్పును ఒప్పుకునే దమ్ము, ధైర్యం పవన్‌కు ఉన్నాయని, సినిమాల్లో నంబర్ వన్ స్థానాన్ని వదులుకుని మరీ రాజకీయాల్లోకి వచ్చిన విషయాన్ని గుర్తు చేశారు. తన సోదరుడు పవన్ ఎవరినీ నమ్మించి మోసం చేయలేదని, చట్టబద్ధంగా విడాకులు తీసుకున్న తర్వాతే ఆయన మరో వివాహం చేసుకున్నారని పేర్కొన్నారు. విడిపోవడానికి కారణాలేంటనేది భార్యాభర్తలకు సంబంధించిన అంతరంగిక విషయమని, ఇందులో ఎలాంటి వివాదాలకు తావులేదని అన్నారు. దీని గురించి మొదటి భార్య గానీ, రేణూ దేశాయ్ గానీ ఎక్కడా మాట్లడలేదని అన్నారు. ఏదో ఒకటి రెండు మాటలు ఇంటర్వ్యూలో మాట్లాడటం వేరని, చట్టబద్ధంగా వారు విడిపోయారని తెలిపారు. కానీ దీనిని పెద్ద రాద్దాంతం చేయడం విడ్డూరమన్నారు. న్యాయంగా బతుకుతున్న పవన్‌పై ఇలాంటి వ్యాఖ్యలు ఎందుకు చేస్తున్నారో తనకు అర్థం కావడం లేదని వాపోయారు.

మరి పెళ్లి చేసుకుని అక్రమ సంబంధాలు నడుపుతున్న వారి సంగతేంటని నాగబాబు నిలదీశారు. పవన్‌ను రాజకీయంగా విమర్శించడానికి సరైన కారణాలు లేకపోవడంతోనే వైవాహిక జీవితాన్ని బజారుకు ఈడుస్తున్నారని మండిపడ్డారు. జగన్ వ్యాఖ్యలు ఆయన అభద్రతా భావానికి నిదర్శనమని నాగబాబు ఎద్దేవా చేశారు. ఆంధ్రప్రదేశ్‌లో పవన్ రాజకీయ శక్తిగా ఎదుగుతున్నాడని, ఆయనను తక్కువ అంచనా వేయొద్దని వైసీపీ, టీడీపీలను నాగబాబు హెచ్చరించారు.