​జగపతి బాబు సంపాదన టార్గెట్ ఎన్ని కోట్లంటే...!

ఇండస్ట్రీలో ప్రస్తుతం చాలా బిజీగా ఉన్న సీనియర్ నటుల్లో జగపతిబాబు ఒకరు. హీరోగా మాత్రమే నటిస్తాననే షరతును పక్కన పెట్టి విలన్, కేరెక్టర్ ఆర్టిస్టుగా నటించడంతో జగపతి కెరీర్ టర్న్ అయ్యింది. ‘లెజెండ్’ ‘లింగా’ వంటి సినిమాల్లో విలన్‌గా నటించడంతో దక్షిణాదిన జగపతికి ఆ తరహా పాత్రలు వెల్లువెత్తుతున్నాయి. ఇక ఇదే సమయంలో హీరోల ఫాదర్ కేరెక్టర్లు కూడా జగపతిని పలకరిస్తున్నాయి. రిచ్ ఫాదర్ కేరెక్టర్‌కు కేరాఫ్ గా మారారు ఈ నటుడు.

తను రిచ్ ఫాదర్ పాత్రలే కాదు, పేద తండ్రి పాత్రలను కూడా చేస్తానని జగపతి బాబు చెబుతున్నారు. ప్రస్తుతం జగపతి మళ్లీ హీరోగా మారారు. ‘పటేల్ సార్’ సినిమాతో ఫుల్ లెంగ్త్ హీరోగా కనిపిస్తున్నారు. ఇది కుటుంబకథా చిత్రమని జగపతి చెబుతున్నారు. ఈ సినిమా కచ్చితంగా హిట్టై తీరుతుందని అంటున్నారు. ఒకవేళ హిట్ కాకపోతే తను నిరాశ చెందుతానని కూడా జగపతి చెప్పేయడం గమనార్హం.

ఇదిలా ఉంటే.. ప్రస్తుతం బిజీగా ఉన్న నేపథ్యంలో జగపతి సంపాదన కూడా అందరికీ ఆసక్తికరమైన అంశంగా మారింది. హీరోగా తీసుకునే పారితోషకం కన్నా కేరెక్టర్ ఆర్టిస్టుగానే జగపతి ఎక్కువ తీసుకుంటున్నాడనే ప్రచారం జరుగుతోంది. ఈ నేపథ్యంలో ఆయననే ఈ విషయం గురించి ఆరాతీస్తే.. మరీ ఎక్కువ డబ్బు సంపాదించేయాలని తనకు లేదనేశారు. మహా అంటే.. నలభై కోట్ల రూపాయలు సంపాదించేయాలని మాత్రం అనుకుంటున్నారట జగపతి. తమ కుటుంబ సభ్యులు నలుగురు అని.. ఒక్కోరికి పది కోట్లు అయితే సరిపోతుందని అనుకుంటున్నట్టుగా.. సరదాగా తన సంపాదన లక్ష్యం గురించి చెప్పారు.