బాప్‌రే!! ఈ సినిమాలో 29 పాటలు

ఈ సినిమాలో 29 పాటలుంటాయట! అవును, మీరు చదివింది నిజమే. అనురాగ్ బసు డైరెక్ట్ చేస్తున్న జగ్గా జాసూస్ చిత్రంలో మొత్తం 29 పాటలుండనున్నాయి. రణ్‌బీర్ కపూర్, కత్రినా కైఫ్ జంటగా నటించిన ఈ సినిమాకు ప్రముఖ కంపోజర్ ప్రీతమ్ చక్రవర్తి మ్యూజిక్ అందిస్తున్నారు. అనురాగ్ బసు డైరెక్షన్‌లో 2012లో వచ్చిన అవార్డ్స్ విన్నింగ్ ఫిలిం 'బర్ఫీ'కి మ్యూజిక్ అందించింది కూడా ప్రీతమ్ చక్రవర్తే కావడం విశేషం.

బర్ఫీ మూవీతోనే బాలీవుడ్‌లో ఓ ప్రయోగం చేసి విమర్శకుల ప్రశంసలు అందుకున్న అనురాగ్ బసు ఈ సినిమాలోనూ రణ్‌బీర్ పాత్రతో మరోసారి ఆడియెన్స్‌ని మెస్మరైజ్ చేసేందుకు రెడీ అయ్యారు. రణ్‌బీర్ ఈ సినిమాలో నత్తి గల వ్యక్తి పాత్ర పోషిస్తుండటమే అందుకు నిదర్శనం. ఈ సినిమా గురించి ప్రీతమ్ మాట్లాడుతూ... " సినిమాలో పూర్తిగా నత్తితో మాట్లాడే రణ్‌బీర్ తాను స్పష్టంగా చెప్పాలనుకున్నది చెప్పేది ఈ 29 పాటల్లోనే" అని అన్నారు. సినిమా కథనంలో భాగంగానే వచ్చే ఈ పాటలు జగ్గా జాసూస్ కథాంశాన్ని ఇంకొంత ముందుకు తీసుకెళ్తాయి అని చెప్పారు ప్రీతమ్.

ఈ సినిమా లాంచ్ అయిన రోజుల్లో లవ్ బర్డ్స్‌గా వున్న రణ్‌బీర్ కపూర్, కత్రినా కైఫ్‌లు ఇద్దరూ షూటింగ్ అనంతరం పరస్పర బేధాభిప్రాయాలతో విడిపోయి దూరమైన సంగతి తెలిసిందే.