‘జై లవకుశ’ కలెక్షన్లపై దెబ్బ తప్పదా..!

భారీ అంచనాల మధ్య విడుదల అయిన ఎన్టీఆర్ సినిమా ‘జై లవకుశ’ పాజిటివ్ టాక్ ను పొందుతోంది. ఎన్టీఆర్ త్రిపాత్రాభినయం చేసిన ఈ సినిమా పాజిటివ్ రివ్యూలనే పొందుతోంది. మంచి రేటింగ్ నే అందుకుంది. వీటికి తగ్గట్టుగా భారీ స్థాయి ఓపెనింగ్స్ కూడా దక్కించుకుంటోంది. మరి ఇంత వరకూ బాగానే ఉంది కానీ.. ఈ సినిమా కలెక్షన్లకు ఎక్కువ సమయం అయితే దొరికేలా లేదు. అనగా ఎన్టీఆర్ సినిమాకు లాంగ్‌రన్ కష్టంగానే కనిపిస్తోంది.

కేవలం వారమంటే వారం రోజులు మాత్రమే ఎన్టీఆర్ సినిమాకు ఛాన్స్ దొరుకుతుంది. ఎందుకంటే.. ఈ నెల 27వ తేదీన మహేశ్ బాబు ‘స్పైడర్’రాబోతోంది! నిన్న..అనగా గురువారం జై లవకుశ విడుదల అయ్యింది. వచ్చే బుధవారమే స్పైడర్ విడుదల కానుంది. ఆ సినిమా కూడా భారీ అంచనాల మధ్యన, భారీ స్థాయి సంఖ్య థియేటర్లలో విడుదల కానున్న సినిమానే. దీంతో జై లవకుశ కలెక్షన్లు ప్రభావితం అయ్యే అవకాశాలు ఎక్కువగా కనిపిస్తున్నాయి.

Also Read: బాక్సాఫీస్ రిపోర్ట్.. ‘జై లవ కుశ’కు రికార్డ్ కలెక్షన్స్

మరి కేవలం మహేశ్ బాబు సినిమానే కాదు.. ఆ వెంటనే శర్వానంద్ క్యూలో ఉన్నాడు. సెప్టెంబర్ 29 వ తేదీన శర్వానంద్ సినిమా ‘మహానుభావుడు’విడుదల కానుంది. అసలే శర్వా మంచి ఫామ్ లో ఉన్నాడు. టీజర్ , ట్రైలర్లతో ప్రేక్షకుల్లో ఆసక్తిని రేకెత్తించాడు. ప్రత్యేకించి యూత్ లో ఈ సినిమా పట్ల ఆసక్తి వ్యక్తం అవుతోంది. ఈ సినిమా కూడా థియేటర్ల సంఖ్య విషయంలో భారీగానే విడుదల కాబోతోంది.

ఒక రకంగా చెప్పాలంటే భారీ పోటీనే ఎదుర్కొంటున్నాడు ‘జై లవకుశ’. రాబోయే సినిమాల ప్రభావం ఎన్టీఆర్ సినిమాపై కచ్చితంగా ఉంటుందని, ప్రత్యేకించి మల్టీఫ్లెక్స్, ఓవర్సీస్ వసూళ్ల విషయంలో జై లవకుశకు స్పైడర్, మహానుభావుడు సినిమాల నుంచి కచ్చితంగా ప్రమాదం ఉందని ట్రేడ్ ఎనలిస్టులు అంచనా వేస్తున్నారు.