'జై లవ కుశ'కు అప్పుడే రూ.36 కోట్ల లాభమా ?

జై లవ కుశ సినిమా విడుదలకి మరో నాలుగు రోజులే మిగిలి వుంది. బాబీ డైరెక్షన్‌లో తన అన్నయ్య కళ్యాణ్ రామ్ సొంత ప్రొడక్షన్స్‌లో తారక్ నటించిన జై లవ కుశ సినిమా ఇప్పుడు ఇండస్ట్రీలో ఓ హాట్ టాపిక్. భారీ అంచనాల మధ్య విడుదలకి రెడీ అయిన ఈ సినిమా విడుదల కన్నా ముందుగానే రూ.36 కోట్ల లాభం మూటకట్టుకుందనే టాక్ వినిపిస్తోంది. తారక్ పారితోషికం, పబ్లిసిటీ ఖర్చులు సహా అన్ని ఖర్చులుపోగా దాదాపు రూ.36 కోట్ల లాభంతో ఈ సినిమా విడుదలవుతోందనేది ట్రేడ్ వర్గాల సమాచారం.

తారక్ ఈ సినిమాలో మూడు విభిన్నమైన పాత్రలు పోషించిన సంగతి తెలిసిందే. ఈ మూడు పాత్రలు నటించిన సన్నివేశాల్లో గ్రాఫిక్స్ మాయాజాలం కోసం భారీ మొత్తంలోనే వెచ్చించాల్సి వచ్చినప్పటికీ.. ఆ గ్రాఫిక్స్ పనులన్నీ కళ్యాణ్ రామ్, తారక్‌లకి దగ్గరి బంధువైన హరి చూసుకోవడంతో ఖర్చు భారం తగ్గిందని తెలుస్తోంది.

ఇక పబ్లిసిటీ విషయానికొస్తే, ఇప్పటికే ఎఫ్ఎం రేడియోల్లో ప్రకటనల కోసం జై లవ కుశ మేకర్స్ రూ. 20 లక్షల వరకు ఖర్చుపెట్టారట. అదీ కాకుండా టీవీ, ప్రింట్, వెబ్‌సైట్స్‌లో ప్రకటనల కోసం అయిన ఖర్చు కోట్ల రూపాయల్లోనే వుందని టాక్. అన్ని ఖర్చులు తీసేసిన తర్వాత అన్ని ప్రాంతాల హక్కులు అమ్ముడవగా రూ.36 కోట్ల లాభం వచ్చిందని ట్రేడ్ వర్గాలు చెబుతున్నాయి. ఈ జై లవ కుశ సినిమాతో ఒక విధంగా కళ్యాణ్ రామ్ గతంలో ఎదుర్కున్న నష్టాలు కొంత కవర్ అయినట్టేనని సమాచారం.