నాన్న అలా అడిగితే బాధేసింది... డైరెక్టర్ బాబీ

ఇటీవల జైలవకుశ చిత్రంతో పెద్ద విజయాన్ని అందుకున్న దర్శకుడు బాబీ. తాజాగా ఓ ఇంటర్వ్యూలో మాట్లాడుతూ చిరంజీవి సినిమాలతో తన కుటుంబానికి ఉన్న అనుబంధాన్ని బాబీ గుర్తుచేసుకున్నాడు. "ఆయన సినిమా విడుదలైతే అందరికంటే ముందు మా నాన్న రెడీ అయిపోయేవారు. ఆయన సందు చివరన నిలబడి ఉంటే, నేను స్కూలుకెళుతున్నానని చెప్పి, యూనిఫామ్ వేసుకుని, చేత్తో క్యారేజీ పట్టుకుని వెళ్లేవాడిని. వీధి చివరన ఉన్న నాన్నతో కలసి చక్కగా సినిమాకు చెక్కేసేవాళ్లం" అని తన చిన్నప్పటి సంగతలు గురించి చెబుతూ, ఓ ఆసక్తికర ఘటనను పంచుకున్నాడు.

కొద్ది రోజుల కిందట నాన్న ఆరోగ్యం పాడైంది. ఆ సమయంలో నన్ను పిలిపించి, "ఏరా, చిన్నప్పుడు నీకన్ని చిరంజీవి సినిమాలు చూపించా. నాకు ఆయన్ని చూపించవా?" అని అడిగితే, ఆ సమయంలో తనకు చాలా బాధేసిందని అన్నారు. దీంతో, వెంటనే దర్శకుడు వినాయక్‌కు ఫోన్ చేసి విషయం చెప్పానని, అరగంటలో చిరంజీవి స్వయంగా ఫోన్ చేసి, తానే మా ఇంటికి వస్తానని చెప్పారని తెలిపారు. ఆయన వస్తే, ఆ సంతోషంలో నాన్నకేమైనా అవుతుందని భయపడి, తామే వస్తామని చెప్పినా చిరంజీవి వినలేదని, 'జై లవకుశ' విడుదల రోజు ఆయన తన ఇంటికి వచ్చి రెండు గంటలు గడిపారని బాబీ వెల్లడించాడు. తన తండ్రికి తానిచ్చిన అతిపెద్ద బహుమతి ఇదేనని అన్నాడు.

యంగ్ టైగర్ ఎన్టీఆర్ త్రిపాత్రాభియనం చేసిన జై లవకుశ చిత్రానికి బాబీ దర్శకత్వం వహించిన విషయం తెలిసింది. ఈ ఏడాది విజయదశమికి విడుదలైన ఈ చిత్రం ఘన విజయం సాధించింది. ఈ చిత్రంలో ఎన్టీఆర్ నటనకు ప్రేక్షకులు బ్రహ్మరథం పట్టారు. జై పాత్రలో ఆయన పలికిన సంభాషణలు, నటనలో చూపించిన వైవిధ్యం ఎప్పటికీ గుర్తిండిపోతుంది.