అజ్ఞాతవాసికే కాదు, జై సింహాకూ అనుమతి!

ఏపీలో సంక్రాంతి సినిమాల ప్రత్యేక షోల పై రాజకీయ దుమారం రేగిన సంగతి తెలిసిందే. పవన్ కల్యాణ్ నటించిన అజ్ఞాతవాసి సినిమాకు అర్ధరాత్రి తర్వాత ప్రీమియర్ షోలకు, పండగ సెలవులంతా అర్దరాత్రి తర్వాత రోజుకు మూడు ఆటలను ప్రత్యేకంగా ఆడించుకునేందుకు అనుగుణంగా ప్రభుత్వం జీవో ఇచ్చింది. మామూలుగా అయితే అర్ధరాత్రి తర్వాత సినిమాల ప్రదర్శనకు అనుమతి ఉండదు. కానీ.. ఈ సినిమా కోసం అనుమతులు జారీ చేసింది ప్రభుత్వం.

పవన్ కల్యాణ్ తెలుగుదేశం పార్టీ మద్దతుదారుగా ఉన్న నేపథ్యంలోనే ఈ అనుమతులు జారీ అయ్యాయనే విమర్శ రానే వస్తోంది. ఇదిలా ఉంటే.. ఇప్పుడు సంక్రాంతి సందర్భంగా విడుదల కాబోతున్న బాలయ్య సినిమా ‘జై సింహా’కు కూడా అదనపు షోలు వేసుకునే అనుమతి లభించబోతోందనే మాట వినిపిస్తోంది. ఈ నెల 12న ఆ సినిమా విడుదల కాబోతోంది. అటు ప్రీమియర్ షోలకు, ఇటు అర్ధరాత్రి తర్వాత అదనపు షోలకు బాలయ్య సినిమాకు అనుమతి లభించే అవకాశం ఉందని తెలుస్తోంది.

ఇందుకు సంబంధించి కూడా జీవో జారీ కానున్నదని సమాచారం. బాలయ్య తెలుగుదేశం అధ్యక్షుడు, ఏపీ సీఎం చంద్రబాబుకు వియ్యంకుడు, అందునా తెలుగుదేశం ఎమ్మెల్యే కూడా.. ఈ నేపథ్యంలో ఈ సినిమాకు ప్రభుత్వం ప్రత్యేక అనుమతులు జారీ చేస్తే.. మళ్లీ విమర్శల వాన మొదలవుతుందేమో!