జయలలితకు కూతురా.. అబద్ధమన్న నటీమణి

తమిళనాడు దివంగత ముఖ్యమంత్రి జయలలితకు కూతురు ఉందన్న ప్రచారాన్ని ఖండించారు అలనాటి అందాల తార లత. అది పూర్తి అబద్ధమని, అసలు అలాంటి ప్రచారాన్ని కూడా తను జీర్ణించుకోలేకపోతున్నాను అని ఆమె అన్నారు. జయలలిత బతికి ఉన్న రోజుల్లో, ఆమె ఆరోగ్యం సవ్యంగా ఉన్న రోజుల్లో.. కూతురు అంటూ ఎవరూ ముందుకు రాలేదే? ఇప్పుడే ఎందుకు వస్తున్నారు? అని ఆమె ప్రశ్నించారు. జయలలితకు సన్నిహితురాలిగా పేరు పొందిన వాళ్లలో ఒకరైన లత ఈ విధంగా వ్యాఖ్యానించడం ఆసక్తిదాయకంగా మారింది.

జయలలితకు కూతురిని అంటూ బెంగళూరుకు చెందిన అమృత‌ అనే మహిళ మీడియా ముందుకు వచ్చిన సంగతి తెలిసిందే. ఈ వాదనతో ఆమె సుప్రీం కోర్టు వరకూ వెళ్లింది. అయితే కోర్టు ఆ పిటిషన్ ను తిరస్కరించింది. అయితే తను జయ కూతురినేనని, కావాలంటే డీఎన్ఏ టెస్టు చేయాలని ఆమె వాదిస్తోంది. ఈ నేపథ్యంలో కొంతమంది స్పందిస్తూ.. భిన్నమైన వాదనలు వినిపిస్తున్నారు. కొందరేమో జయలలితకు కూతురు ఉందని అంటుంటే.. మరికొందరు అబ్బే అది అబద్ధం అంటున్నారు.

జయకు కూతురు లేదన్న వారి జాబితాలో నిలుస్తోంది లత. జయలలితకు కూతురే ఉంటే.. ఆమె ధైర్యంగా ఒప్పుకునేదని, ఆ విషయాన్ని దాచి పెట్టే పిరికిమనిషి కాదామె.. అని లత వ్యాఖ్యానించారు. ఇక ఆర్కే నగర్ బై పోల్ గురించి మాట్లాడుతూ.. అన్నాడీఎంకే తనను పిలిస్తే ప్రచారానికి వెళ్తానని ఈమె అన్నారు. విశాల్ అక్కడ పోటీ చేయడాన్ని స్వాగతించారు. ప్రజలతో మమేకం అయ్యేవారెవరైనా రాజకీయాల్లోకి రావొచ్చని ఆమె వ్యాఖ్యానించారు.