‘టిక్:టిక్:టిక్’ ట్రైలర్.. గ్రహశకలంతో యుద్ధం!

తమిళ హీరో జయం రవి సినిమాలన్నీ వైవిధ్యంగా ఉంటాయి. ఎడిటర్ మోహన్ తనయుడైన రవి.. తెలుగులో సూపర్ హిట్ అయిన ‘జయం’ సినిమా రీమేక్ ద్వారా తమిళనాట హీరోగా తెరంగేట్రం చేశారు. తొలి సినిమాతోనే బోలెడన్ని అవార్డులు సొంతం చేసుకున్నారు. ఆ తరవాత ఆయనవన్నీ ప్రయోగాత్మక సినిమాలే చేశారు. లవర్ బాయ్‌గా పరిచయమై ఆ తరవాత యాక్షన్ సినిమాలతో తన ఇమేజ్‌ను పెంచుకున్నారు. 2015లో ‘తని ఒరువన్’ సినిమాతో తమిళనాట మరింత క్రేజ్ సంపాదించారు. ఈ సినిమాను తెలుగులో రామ్ చరణ్ ‘ధృవ’ పేరుతో రీమేక్ చేశారు.

ఇదిలా ఉంటే.. జయం రవి హీరోగా నటించిన తాజా తమిళ చిత్రం ‘టిక్‌:టిక్‌:టిక్’. ఈ చిత్రాన్ని అదే పేరుతో తెలుగులో విడుదల చేస్తున్నారు. శ‌క్తి సౌంద‌ర్ రాజ‌న్ ద‌ర్శకత్వం వహించిన ఈ చిత్రం సైంటిఫిక్ యాక్షన్ థ్రిల్లర్‌గా తెరకెక్కింది. ఈ సినిమా ట్రైలర్‌ను సాయిధరమ్ తేజ గురువారం ట్విట్టర్ ద్వారా విడుదల చేశారు. ట్రైలర్ చూస్తుంటేనే టెక్నికల్‌గా అత్యుత్తమ ప్రమాణాలతో తెరకెక్కించినట్లు అర్థమవుతోంది. భూమికి గ్రహశకలం నుంచి ముప్పు పొంచి ఉంటుంది. ఆ గ్రహశకలం వల్ల మన దేశానికి తీవ్ర నష్టం వాటిల్లనుంది. దీన్ని ఓ అణ్వాయుధంతోనే నాశనం చేయగలం. దాన్ని ఎలా నాశనం చేశారనేదే చిత్రం. దీన్ని సూచన ప్రాయంగా ట్రైలర్‌లో చూపించారు. ట్రైలర్‌తో సినిమాపై అంచనాలను పెంచారు.
Here we go guys the Telugu trailer of #TikTikTik @actor_jayamravi @ShaktiRajan @NPethuraj and the whole team of #TikTikTikTelugu https://t.co/KzhElYCMcf all the best guys 👍🏼👍🏼👍🏼 — Sai Dharam Tej (@IamSaiDharamTej) January 18, 2018
ఈ చిత్రంలో జయం రవికి జంటగా నివేదా పెతురాజ్ నటించింది. జయప్రకాష్, ఆరోన్ అజీజ్, రమేష్ తిలక్, విన్సెంట్ అశోకన్, మన్సూర్ అలీ ఖాన్ తదితరులు ముఖ్య పాత్రల్లో నటించారు. డి. ఇమాన్ సంగీతం అందించిన ఈ చిత్రాన్ని తెలుగులో ఎస్టీటీవీ ఫిల్మ్స్ పతాకంపై పద్మావతి చదలవాడ విడుదల చేస్తున్నారు. జనవరి 26న ఈ చిత్రాన్ని ప్రేక్షకుల ముందుకు తీసుకువచ్చేందుకు సన్నాహాలు చేస్తున్నారు.