ఆయన ఎక్కడున్నా మమ్మల్ని కాపాడుతూనే ఉంటారు

జయసుధ భర్త మూడు రోజుల క్రితం ముంబైలో మరణించిన సంగతి తెలిసిందే. జీవిత సహచరుడిని కోల్పోయిన జయసుధ తీవ్రవిషాదంలో మునిగిపోయారు. కాగా మార్చి 17 జయసుధ - నితిన్ కపూర్ ల పెళ్లిరోజు. దీంతో ఆమె తన ఫేస్ బుక్ ఖాతా ద్వారా స్పందించారు. తన బాధని, భర్తపై ఉన్న ప్రేమని పోస్టు ద్వారా అభిమానులకు తెలియజేశారు. ‘నా ప్రియమైన భర్త నితిన్ కపూర్ ఇప్పుడు దేవతలతో కలిసి ఉన్నారు. ఆయన ఎన్నో ఏళ్లుగా వెతుకుతున్న శాంతిని... చివరికి సాధించారు. డిప్రెషన్ అనేది చాలా తీవ్రమైన మెడికల్ కండిషన్. మీడియా మా జీవితంలోని చీకటి రోజులను సంచలనంగా మార్చకుండా... ప్రైవసీ ఇచ్చినందుకు ధన్యవాదాలు తెలియజేస్తున్నా.

సరిగ్గా ఇదే రోజు... 32 ఏళ్ల క్రితం నాకు, నితిన్‌కు పెళ్లయ్యింది. ఈ పెళ్లి రోజున మా ఇద్దరం గడిపిన ఎన్నో తీయని క్షణాలు నాకిప్పుడు గుర్తొస్తున్నాయి. ఆయన ఎక్కుడున్నా తన ప్రేమతో నన్ను, నా పిల్లల్ని రక్షిస్తూ ఉంటారు. ఆయనకు శాంతి, ఆనందం దక్కాలని ఆశీర్వదించండి. నా జీవితంలో జరిగిన విషాద ఘటనలో మద్దతు ఇచ్చిన వారందరికీ నా ధన్యవాదాలు’ అని పోస్టులో పేర్కొన్నారు జయసుధ.

జయసుధకు, నితిన్ కపూర్‌కు 1985లో పెళ్లయ్యింది. వీరికి ఇద్దరు కొడుకులు కూడా ఉన్నారు.