డ్రంకెన్ డ్రైవ్ కేసులో సినీ హీరో అరెస్ట్

అనంతపురం 1980, జర్నీ, రాజా రాణి వంటి చిత్రాలతో తెలుగు ఆడియెన్స్‌కి సుపరిచితుడైన తమిళ నటుడు జైకి తృటిలో ప్రాణాపాయం తప్పింది. చెన్నైలోని అడ్యార్ బ్రిడ్జిపై జై నడుపుతున్న ఆడి కారు ఉన్నట్టుండి బ్రిడ్జి రైలింగ్‌ని ఢీకొంది. అదృష్టవశాత్తుగా ఈ ప్రమాదంలో జైకి ఎటువంటి గాయాలు కాలేదు. ప్రమాదం జరిగిన సమయంలో ప్రముఖ తమిళ కమెడియన్ ప్రేమ్‌జి అమరెన్ కూడా జైతోపాటే వున్నాడు. గురువారం తెల్లవారుజామునే ఈ ప్రమాదం జరిగిన అనంతరం చెన్నై పోలీసులు జైని డ్రంకెన్ డ్రైవింగ్ కేసులో అదుపులోకి తీసుకుని బెయిల్‌పై విడుదల చేశారు.

ప్రమాదం జరిగిన సమయంలో జై మత్తులో వున్నాడని పోలీసులు చెబుతుండగా అతడి పక్కనే వున్న ప్రేమ్‌జి మాత్రం అదంతా ఉత్తి ట్రాష్ అని పోలీసుల అభిప్రాయాన్ని కొట్టిపారేస్తున్నాడు. జై ప్రధాన పాత్రలో నటించిన బెలూన్ సినిమా త్వరలోనే రిలీజ్ కానుంది. ఈ హారర్ థ్రిలర్‌లో జై సరసన అతడి గాళ్‌ఫ్రెండ్‌గా వార్తల్లోకెక్కిన రాజోలు బ్యూటీ అంజలి జంటగా నటించింది.