ఎన్టీఆర్ ‘బిగ్ బాస్’.. ఎపిసోడ్‌కి అర కోటి!

యంగ్ టైగర్ ఎన్టీఆర్‌కి మాస్ ఆడియన్స్‌లో ఎంత క్రేజ్ ఉందో అందరికీ తెలిసిందే. ఒకప్పుడు ఎన్టీఆర్ విజిలేస్తే సోడా బుడ్డిలు పగిలేవి.. తొడగొడితే సుమోలో గాల్లోకి లేచేవి. ఆ తరవాత మనోడు స్టైలు మార్చాడు. ‘యమదొంగ’తో స్లిమ్‌గా మారిపోయిన జూనియర్.. ఆ తరవాత ‘బృందావనం’, ‘నాన్నకు ప్రేమతో’, ‘జనతా గ్యారేజ్’ వంటి విభిన్న చిత్రాలు చేసి క్లాస్ ఆడియన్స్‌కు చేరువయ్యాడు. తెలుగు చిత్ర పరిశ్రమలో ఎన్టీఆర్‌లా డైలాగులు పలికే యువ హీరో లేడంటే అతిశయోక్తి కాదు. దీన్నే స్టార్ మా ఛానెల్ క్యాష్ చేసుకోవాలని నిర్ణయించుకుంది.

అందుకే హిందీలో సూపర్ హిట్ అయిన ‘బిగ్ బాస్’ టెలివిజన్ షోను తెలుగులో ఎన్టీఆర్ హోస్ట్‌గా నిర్మిస్తోంది. ఇప్పటికే అధికారికంగా ఖరారైన ఈ షో.. షూటింగ్ కూడా జరుపుకుంటోంది. మరి ఇంత పెద్ద షోకు హోస్ట్‌గా వ్యవహరిస్తున్న ఎన్టీఆర్ భారీ పారితోషికాన్నే అందుకుంటున్నాడు. ఒక ఎపిసోడ్‌కి అక్షరాలా రూ. 50 లక్షలు ఎన్టీఆర్‌కి ముట్టజెబుతోందట స్టార్ మా. సౌతిండియాలో టెలివిజన్ షో కోసం ఓ హీరో ఈ రేంజులో పారితోషికం తీసుకోవడం ఇదే ప్రథమం. భారీ బడ్జెట్‌తో నిర్మిస్తున్న ‘బిగ్ బాస్’ షో తెలుగులో ఎంత విజయం సాధిస్తుందో తెలియాలంటే ఇంకొన్ని రోజులు ఆగాల్సిందే!