త్రివిక్రమ్ కోసం ఎన్టీఆర్ మార్షల్ ఆర్ట్స్ ట్రైనింగ్!

తెలుగు సినీ ప్రేమికులు ఆసక్తిగా ఎదురుచూస్తున్న కాంబినేషన్లలో త్రివిక్రమ్ శ్రీనివాస్-ఎన్టీఆర్ ఒకటి. ఎలాంటి డైలాగునైనా అవలీలగా చెప్పేసే ఎన్టీఆర్‌తో త్రివిక్రమ్ ఎలాంటి సంభాషణలు పలికిస్తాడోనని అంతా ఆసక్తిగా ఎదురుచూస్తున్నారు. ‘జై లవ కుశ’ తరవాత త్రివిక్రమ్ శ్రీనివాస్ దర్శకత్వంలో ఎన్టీఆర్ నటించనున్నాడు. అయితే ఈ సినిమా గురించి ఇప్పటి వరకు పెద్దగా సమాచారం బయటకు రాలేదు. ఇప్పుడు ‘జై లవ కుశ’ షూటింగ్ పూర్తికావడం, విడుదలకు సిద్ధమవుతుండటంతో త్రివిక్రమ్-ఎన్టీఆర్ సినిమాకి సంబంధించి తాజాగా ఓ వార్త బయటికి వచ్చింది. త్రివిక్రమ్ సినిమా కోసం ఎన్టీఆర్ ప్రత్యేకంగా మార్షల్ ఆర్ట్స్ నేర్చుకుంటున్నాడట.

త్రివిక్రమ్, ఎన్టీఆర్ తొలిసారి జతకడుతున్నారు. కాబట్టి సినిమా విషయంలో ఎక్కడా రాజీపడకూడదని అనుకున్నారట. అందుకనే తారక్‌ ప్రత్యేకంగా థాయ్‌లాండ్‌, ఇండోనేషియా స్టైల్‌ మార్షల్‌ ఆర్ట్స్‌లో శిక్షణ తీసుకోనున్నట్లు టాలీవుడ్‌ వర్గాల సమాచారం. రొమాంటిక్ యాక్షన్ ఎంటర్‌టైనర్‌గా తెరకెక్కనున్న ఈ సినిమాలో ఫైట్లకు మంచి ప్రాధాన్యత ఉందట. అందుకే అవి రియలిస్టిక్‌గా ఉండాలని ప్రత్యేకంగా ఎన్టీఆర్ మార్షల్ ఆర్ట్స్ నేర్చుకుంటున్నారని టాక్. దీని కోసం ఒక నిపుణుడుని కూడా నియమించుకున్నాడట.

ప్రస్తుతం త్రివిక్రమ్.. పవన్ కల్యాణ్ 25వ సినిమాతో బిజీగా ఉన్నారు. అను ఇమ్మానియేల్, కీర్తి సురేష్ హీరోయిన్లు. ఈ సినిమా సంక్రాంతి సందర్భంగా విడుదల కానుంది. ఇదిలా ఉండగా ఎన్టీఆర్ తన తాజా చిత్రం ‘జై లవ కుశ’ ప్రమోషన్స్‌లో బిజీగా ఉన్నారు. ఈ సినిమా సెప్టెంబర్ 21న ప్రేక్షకుల ముందుకు రానుంది. ఈ ఇద్దరు తమ ప్రాజెక్టులను పూర్తి చేసుకున్న తరవాత కొత్త సినిమాను ప్రారంభించనున్నట్లు తెలుస్తోంది.