ఎన్టీఆర్ బిగ్ బాస్‌ షోకి ‘వైరస్’!

యంగ్ టైగర్ ఎన్టీఆర్ 'బిగ్ బాస్' షోకి వ్యాఖ్యాతగా వ్యవహరించనున్న సంగతి తెలిసిందే. అయితే ఈ షోలో పాల్గొనబోయే 12 మంది పోటీదారులు ఎవరనే విషయాన్ని కార్యనిర్వాహకులు వెల్లడించలేదు. నమిత,యాంకర్ శ్రీముఖి అలానే కొందరు సీనియర్ స్టార్ హీరోయిన్ల పేర్లు చాలనే వినిపించినప్పటికీ షోలో పాల్గొనబోయే సెలబ్రిటీల వివరాలను సీక్రెట్‌గాను ఉంచారు నిర్వాహకులు. తాజాగా ఈ షోలో పాల్గొనబోయే ముగ్గురు పోటీదారుల పేర్లు బయటకుపొక్కాయి. అందులో ఇటీవల వైరస్ మూవీతో సందడి చేసిన సంపూర్ణేష్ బాబు పేరు ముందు వరుసలో ఉండగా.. ఐటమ్ బ్యూటీ ముమైత్ ఖాన్, హీరో నవదీప్‌ల పేర్లు ఈ లిస్ట్‌లో ఉన్నాయి.

కామెడీ హీరోగా సంపూ చేసే ప్రయత్నాలు ఈ మధ్య బెడిసి కొడుతున్నాయి. ఈ క్రమంలో తనను ఓ కంటెస్టెంట్‌గా ఫైనల్ చేశారు. అలానే అప్పట్లో పోకిరి చిత్రంతో ఇప్పటికింకా నా వయసు నిండా పదహారే అంటూ కుర్రకారుని ఉర్రూతలూగించిన ‘ముమైత్ ఖాన్‌ను బుల్లితెరపైకి తీసుకొస్తున్నారు. ఒకప్పుడు ఐటెమ్ సాంగ్స్‌తో బాగా పాపులర్ అయిన ముమైత్ క్రమేపీ తెరపై కనిపించకుండా పోయింది. తాజా చిత్రాల్లో హీరోయిన్లే ఐటెమ్ సాంగ్స్‌కు రెడీ అయిపోవడంతో ఇక ముమైత్‌ను అందరూ లైట్ తీసుకున్నారు. మొన్నామధ్య 'తిక్క' సినిమాలో అవకాశం వచ్చినా.. ఆ సినిమా కూడా డిజాస్టర్ కావడంతో ముమైత్ కు అవకాశాలు లేకుండా పోయాయి. ఈ నేపధ్యంలో 'బిగ్ బాస్' షో కోసం ఆమెను సంప్రదించగా అంగీకరించింది. హీరోగా అవకాశాలు తగ్గిపోయిన నవదీప్ కొన్ని రియాలిటీ షోలకు పరిమితం అయ్యాడు. ఈ ముగ్గురితో పాటు యాంకర్ రవి, లాస్య, పోసాని, ధనరాజ్ పేర్లు కూడా వినిపిస్తుండగా అధికారిక ప్రకటన రావాల్సిఉంది.