అన్నకు ప్రేమతో.. 'జై లవకుశ' టీజర్!

యంగ్ టైగర్ ఎన్టీఆర్ త్రిపాత్రాభినయం చేస్తోన్న చిత్రం 'జై లవకుశ'. బాబీ డైరెక్ట్ చేస్తోన్న ఈ సినిమా ఫస్ట్ లుక్‌కు విపరీతమైన స్పందన లభిస్తోంది. మూడు పాత్రల్లో ఒక పాత్ర లుక్‌ను విడుదల చేయగా.. త్వరలోనే టీజర్‌ను విడుదల చేయడానికి రెడీ అవుతున్నారు. జూలై మొదటి వారంలో అభిమానులకు ట్రీట్ ఇవ్వడానికి చిత్రబృందం సిద్ధమవుతోంది.

నందమూరి ఆర్ట్స్ పతాకంపై కల్యాణ్ రామ్ ఈ చిత్రాన్ని నిర్మిస్తున్నారు. అయితే జులై మొదటి వారానికి మరో విశేషం ఉంది. జులై 5న నందమూరి హీరో, ఈ చిత్రనిర్మాత కల్యాణ్ రామ్ పుట్టినరోజు. కాబట్టి జులై 5న కల్యాణ్ రామ్ పుట్టినరోజు కానుకగా ఈ టీజర్‌ను విడుదల చేయడం దాదాపు ఖాయంగానే కనిపిస్తుంది.

‘జైలవకుశ’లో ఎన్టీఆర్‌కు జంటగా నివేదా థామస్, రాశి ఖన్నాలు కనిపిస్తుండగా మరో ముఖ్య పాత్రలో నందిత కనిపించనుంది. ఈ చిత్రాన్ని సెప్టెంబర్‌లో ప్రేక్షకుల ముందుకు తీసుకురావడానికి సన్నాహాలు చేస్తున్నారు.